Әмир Сафин: «Яңа маршрут челтәре гамәлдә булган беренче көннәрдә трамвайлар эшендә өзеклекләр булмады»

Башкарма комитет җитәкчесе Рөстәм Гафаров 2 нче июльдән гамәлгә кергән үзгәрешләр турында шәһәрлеләргә хәбәр итүне дәвам итәргә кушты.

Фото: Денис Гордийко

(Казан шәһәре KZN.RU, 4 нче июль, Дмитрий Никитин). 2 нче июльдән Татарстан башкаласында трамвай маршрутларының яңа схемасы эшли башлады. Узган ял көннәрендә «Караваево», «Тимер юл вокзалы» һәм «Елга порты» кебек зур күчеп утыру тукталышларында «Метроэлектротранс» хезмәткәрләре кизү торды, пассажирларга яңа маршрут челтәре, шулай ук «Трамвай 60 минут» тарифы турында хәбәр иттеләр. «Шәһәр халкына трамвай маршрутларындагы үзгәрешләр турында хәбәр итүне дәвам итәргә кирәк», – дип йөкләде эшлекле дүшәмбе вакытында Казан Башкарма комитеты җитәкчесе Рөстәм Гафаров.

Транспорт комитеты рәисе Әмир Сафин хәбәр иткәнчә, яңа җәдвәл эшләнгән, яңа маршрут челтәре гамәлдә булган беренче көннәрдә трамвайларның эшендә өзеклекләр булмаган. Барлык вагоннарда да трамвай маршрутларының яңа схемасы һәм белешмә кәгазьләре урнаштырылган, тукталышларны игълан итүче автоинформаторлар яңадан яздырылган. Якындагы атнада «Метроэлектротранс» хезмәткәрләре һәм волонтерлар шәһәрлеләргә трамвай маршрутларындагы барлык үзгәрешләр турында хәбәр итүне дәвам итәчәкләр, дип нәтиҗә ясады Ә.Сафин.

Исегезгә төшерәбез, 2 нче июльдән трамвай маршрутларының саны сигезгә кадәр артты, ә гомуми челтәр бер ярым тапкырга диярлек үсте – 146 км дан 247 км га кадәр. Маршрут челтәрен үзгәртү мәсьәләләре буенча казанлылар башкаланың Транспорт комитетының +7 (843)275-30-50 кайнар линия телефонына мөрәҗәгать итә алалар.