Диния нәзарәте активистлары Казанның Яңа Татар зиратында өмә ясады

Элегрәк «Чиста мәчет» проекты волонтерлары «Бишбалта» зираты территориясен чистарткан иде.

Фото: Марат Мугинов

(Казан шәһәре KZN, 30-нчы апрель). Татарстан мөселманнары Диния нәзарәте хезмәткәрләре кичә Казанның Яңа Татар зиратында өмә уздырды. Активистлар территориянең шактый өлешен тәртипкә китерделәр, каберләрне кыш буена җыелган ботаклардан һәм яфраклардан, чытырманныклардан чистарттылар.

2-нче майда Яңа Татар зиратында остазларны искә алу көнен үткәрү планлаштырыла. Исегезгә төшерәбез, биредә 50-дән артык күренекле дин эшлеклесе, мәгърифәтче һәм мөселман галимнәре күмелгән. Алар арасында: Галимҗан Баруди, Әхмәтһади Максуди, Сөнгатулла Бикбулатов, Зәкәрия Минвәлиев, Габделхак Саматов, Әхмәтзәки Сафиуллин һәм башкалар. Шунысы игътибарга лаек, 2015 елда шимбә өмәсе аркасында ТР мөселманнары Диния нәзарәте шәех Габдулла Габделхак каберен тапкан.

Алдарак ТР мөселманнары Диния нәзарәтенең «Чиста мәчет» проекты волонтерлары «Бишбалта» татар зиратында өмә уздырганнар иде. Яшьләр корыган агачларны кискәннәр, территорияне ботак һәм яфраклардан чистартканнар, дип хәбәр итә ТР мөселманнары Диния нәзарәте матбугат хезмәте.

Шулай ук укыгыз

Барлык яңалыклар