«Ак Барс» үз кырындагы уеннар сериясендә өченче җиңүгә иреште

Казан клубы хоккейчылары Магнитогорскның «Металлург» командасын 2:0 исәбе белән җиңде.

(Казан шәһәре KZN.RU, 8-нче гыйнвар). Казанның «Ак Барс» командасы үз кырындагы уеннар сериясендә өченче җиңүгә иреште. Кичә «Татнефть-Арена»да Магнитогорскның «Металлург» командасына каршы узган матч 2:0 исәбе белән тәмамланды.

Исәпне икенче таймда гына ача алдылар. Уенның 25-нче минутында алканы кунаклар капкасына Олег Ли кертте. Киләсе таймның 41-нче минутында кертелгән икенче голның авторы Данис Зарипов булды.

«Ак Барс» континенталь хоккей лигасының көнчыгыш конференциясендә турнир таблицасының беренче баскычын биләвен дәвам итә. Хоккейчылар 43 матчта 27 җиңү яулады һәм 66 очко туплады.

Искәртеп узабыз, хәзерге үз кырларындагы сериядә «барслар» Ярославльнең «Локомотив»ы һәм Чиләбенең «Трактор»ы белән уйнады инде. Ике матч та казанлыларның җиңүе белән тәмамланды. Сериянең соңгы матчы иртәгә, 9-нчы гыйнварда, Түбән Новгородның «Торпедо» командасына каршы узачак. «Татнефть-Арена»да уен 19.30 сәгатьтә башлана, дип хәбәр ителә Казан хоккей клубы сайтында.

Шулай ук укыгыз

Барлык яңалыклар