В целях анализа посещаемости и улучшения работы портала мы используем сервис «Яндекс.Метрика». Оставаясь на нашем портале, Вы выражаете свое согласие на обработку Ваших данных указанным сервисом.
Яңалыклар
24.09.2021, 16:55
Ял көннәре өчен афиша: «акыллы фильмнар», төнге велопроменад һәм Элвин Грей җырлары астында тренировкалар
Булачак уикендның иң кызыклы вакыйгалары – KZN.RU порталы материалында.
Фото: Денис Гордийко
(Казан шәһәре KZN.RU, 24-нче сентябрь). Тәрәзә артында чын көзгә хас һава торышы булуга карамастан, шәһәр паркларында һаман да тормыш кайный. Дөрес, урам чаралары сезоны инде төгәлләнеп килә. Бу ялларда шәһәрлеләрнең «Итил» этник мәдәниятнең беренче фестивалендә катнашу, «Яшел фитнес» оештырган дәресләрдә шөгыльләнү яки «Аксенов-фест»ка бару мөмкинлеге бар. Киләсе ялларда барлык булачак чаралар турында тулырак KZN.RU порталы афишасында укыгыз.
«Аксенов-фест»ның йомгаклау көне (6+)
25-нче сентябрь 10:00 сәгатьтә
Масштаблы әдәби-музыкаль фестивальнең төп чаралары артта калды. «Аксенов-фест»ның рәсми ябылышы да инде узды диярлек. Ләкин узып баручы поездның соңгы вагоннарына сикерергә мөмкинлек бар әле. Оештыручылар казанлыларга һәм туристларга зур булмаган сюрприз – балалар һәм өлкәннәр өчен тулы бер шигырьләр марафонын калдырган. Очрашуны Максим Амелин, Анастасия Строкина, Анастасия Шумилова һәм Денис Осокин үткәрәчәк. Шуннан соң катнашучы-язучылар төрле шәһәрләргә таралыр.
Адрес: В.П. Аксенов музей-йорты, К.Маркс урамы, 55. Катнашу ирекле.
«Өлкәннәрчә уйныйбыз» концерты (0+)
25-нче сентябрь 16:00 сәгатьтә
Музыкаль-гаилә кичәсе бу шимбәдә узачак. Казанлылар һәм шәһәр кунаклары өчен хәйрия концерты оештырыла. Очрашуда төрле метаморфозлар турында фикер алышачаклар: «Людовико Эйнауди әгәр дә болытлар – ак яллы атлар дигән җырны язса,» яки «әгәр Кызыл Калфак рэп укыса, Антошка блюз җырласа ни булыр иде?». Кунакларны Сергей Костюжов һәм Регина Рокитянская үз иҗатлары белән сөендерәчәк. Чара балалар өчен дә, өлкәннәр өчен дә туры киләчәк.
Адрес: «Мәскәү» мәдәни үзәге , Академик Королев урамы, 47. Керү ирекле түләү буенча.
«Тиффанида иртәнге аш» фильмын күрсәтү һәм фикер алышу (0+)
25-нче сентябрь 17:00 сәгатьтә
Кино яратучылар бу ял көнендә бергә җыела һәм «Тиффанида иртәнге аш» популяр комедиясен карый алачак. Бу шул ук исемдәге Трумен Капоте новелласын экранлаштыру, ул соңыннан Голливуд кинематографының күпләр яраткан фильмына һәм классикасына әйләнде. Анда 1960 еллардагы купшы атмосфера вакытка бәйсез темалар белән гармонияле яраша, алар еллар узу белән актуальлеген югалтмый. Соңыннан фильм турында фикер алышу булачак.
Адрес: Сверхмодерн сәнгать галереясе, Дзержинский урамы, 5, цоколь каты. Керү ирекле.
Көзге Open Space Market (0+)
25-26-нчы сентябрь, 11:00 сәгатьтән 20:00 сәгатькә кадәр
Бу ял көннәрендә шәһәрлеләр маркетта кием-салым, бизәнү әйберләре, йорт өчен товарлар, хәтта парфюмерия һәм косметика сайлый алачак. Аларга үз продукциясен Россиянең 29 шәһәреннән килгән катнашучы ярминкәдә тәкъдим итәчәк. Моннан тыш, мәйданчыкта Ләйсән Усманова командасы стилистлары эшләячәк, алар теләге булган һәркемгә стиль буенча экспресс-киңәшләр бирәчәк, ә Алисә Тулынинаның пумалалар белән корнере янында визажистлар эшләячәк. Маркетның аерым зонасын экологиягә һәм акыл белән куллануга багышлаячаклар. Моннан тыш, чарада фәнни тематикага – кешенең һәм физиканың фән буларак килеп чыгышыннан алып вакциналаштыру һәм вирусологиягә кадәр, шулай ук Татарстанның махсус саклана торган табигать территорияләрен булдыру буенча уңышлы тәҗрибәләр темасына лекцияләр узачак. Шулай ук маркет кунакларын гамәли мастер-классларга да көтәләр, анда алар сезонлы корымый торган чәчәкләрдән көзге композиция җыя алачаклар, шулай ук финанс дисциплинасын үтәргә өйрәнәчәкләр. Урамда фудкортлар оештырылачак һәм партнерлардан стендлар ачылачак. Шимбә төнендә махсус бию өчен каралган ике мәйданчыкта һәм Россиянең топ артистлары музыкасы астында маркетның башка версиясе узачак. Тулы җәдвәл монда.
Адрес: Казан Үзәк универсаль кибете, Мәскәү урамы, 2. Чараның 2 көненә билет – 100 сум, мәктәп укучылары һәм студентларга – 50 сум, 7 яшькә кадәрге балаларга һәм пенсионерларга – бушлай.
Идел буе халыклары фестивале «Итил» (6+)
25-26-нчы сентябрь, 12:00 сәгатьтән 20:00 сәгатькә кадәр
Казанда беренче тапкыр Идел буе халыкларының уникаль шәһәр фестивале узачак, ул музыканы, театрны, гореф-гадәтләрне һәм заманча сәнгатьне берләштерәчәк. Кунакларны татар синти-попы, удмурт гранжы һәм чуаш джазы көтә. Аерым мәйданчыкта гаилә остаханәләре эшләячәк, аларда теләге булган һәркем сувенирлар ясый яки яңа һөнәр үзләштерә алачак. Моннан тыш, килүчеләрнең кием-салым, бизәнү әйберләре, кул эшләре өчен товарлар сатып алу, шулай ук милли һәм җайлаштырылган кухняны бәяләү мөмкинлеге булачак. Фестивальнең хедлайнеры исә «Евровидение - 2021» катнашучысы, җырчы Манижа, ул төп сәхнәдән үзенең хитларын башкарачак.
Адрес: «Казан» гаилә үзәге каршындагы мәйданчык, С.Хәким урамы, 4. Керү ирекле.
Төнге велофест (18+)
25-нче сентябрьдән 26-нче сентябрьгә каршы төндә, 20:00 сәгатьтән
Шәһәр матурлыгына кызыклы компаниядә шимбәдән якшәмбегә каршы төндә теләгән һәркем соклана алачак. 4 сәгать эчендә велоэкскурсиядә катнашучылар Казанның үзәк урамнары буйлап узачак һәм кызыклы фактлар турында беләчәк. Аудиоэкскурсияне шәһәрнең танылган кешеләре алып барачак. «Төнге велофест» ачылышы диджей-сетлар белән озатылачак, кунаклар өчен фудкорт оештырачаклар. Маршрутта тукталышлар каралган – велосипедчылар тамак ялгап ял итә алачак. Катнашучылар 20:00 сәгатьтә җыела, йөрү 22:00 сәгатьтә башлана.
Адрес: Беренче Май мәйданы. Катнашучыларны теркәү проект сайтында уздырыла.
«Акыллы кино» бөтенроссия фестивале (6+)
26-нчы сентябрьгә кадәр, 14:00 сәгатьтән 20:30 сәгатькә кадәр
Фәнни-популяр фильмнарны карарга яратучыларны «Акыллы кино» фестивалендә көтәләр. Бу ялларда шәһәр халкының заманча фән, мәдәният һәм яңа технологияләр дөньясына чуму өчен соңгы мөмкинлеге бар. Мәсәлән, 25-нче сентябрьдә казанлылар «Кыргыйлар һәм иреклеләр», «Киләчәк һөнәре» һәм «Киләчәк заман каршылыгы: яңа технологик тәртипме яки биологик революцияме?» фильмнарын карый алачак, ә 26-нчы сентябрьдә аларны «Төлке тәрбиясе буенча кыскача ярдәмлек», «Бер бөтен организм буларак планета, яки табигатьтә артык төрләр юк», «Кыргыйлар һәм иреклеләр» кебек кинохезмәтләр көтә.
Адрес: ТР Милли китапханәсе, Пушкин урамы, 86. Керүт теркәлү буенча бушлай.
«Призма» күргәзмәсе (6+)
21-нче октябрьгә кадәр, көн саен 12:00 сәгатьтән 19:00 сәгатькә кадәр (дүшәмбедән тыш)
Казан Ратушасында 2020 елгы вакыйгаларга яшь фотографлар күзләре аша карарга мөмкин. Алар локдауннан соң җанланган шәһәргә багышланган фотолар сериясен тәкъдим итәчәкләр, һәм үзизоляция чорының авторларны өйдә калырга мәҗбүр итүе, ләкин аларның иҗатын тартып алмавы турында сөйләячәкләр. Бу чор күргәзмәдә катнашучыларны «Карантиндагы фотограф» шигаре астында берләштерде. Һәр көнне, өйдә калырга мәҗбүр булучылар иҗат өчен яңа темалар эзләделәр һәм гадәти мохиткә әйләнеп кайтуны түземсезлек белән көттеләр.
Адрес: «Тәрәзә» Заманча сәнгать галереясе, Карл Маркс урамы, 33/62. Керү ирекле.
«Пресинема» күргәзмәсе (6+)
27-нче мартка кадәр, 10:00 сәгатьтән 18:00 сәгатькә кадәр (дүшәмбе – пәнҗешәмбе, шимбә – якшәмбе) һәм 11:00 сәгатьтән 20:00 сәгатькә кадәр (җомга)
Казанлыларга XIX-XX гасырларда кино һәм анимация үсешенә ярдәм иткән йөздән артык уникаль приборлар тәкъдим ителәчәк. Күргәзмәдә кинематограф һәм мультипликация чоры нәрсәдән башлануын, стереоскоп һәм күләгә театрының ничек төзелүен, тауматроп һәм зоотропның нәрсә икәнен белергә мөмкин булачак. Проектның авторы – Россиядә иң зур анимация оптика уенчыклары җыелмасының хуҗасы Максим Васильев.
Адрес: «Манеж» күргәзмә залы, Шейкман проспекты, 1а. Керү ирекле.
Женя Мироновның «Метафоралар төзелеше» фотокүргәзмәсе (16+)
7-нче ноябрьгә кадәр, 13:00 сәгатьтән 21:00 сәгатькә кадәр
Тверьда туган Мәскәү рәссамының эшләрен «БИЗОN» галереясында карарга мөмкин булачак. Экспозиция 62 диптихтан тора, аларда автор бөтенләй төрле предметлар һәм күренешләр кебек тоелган пластик һәм эмоциональ уртаклыкны ача. Бу эшләрне 33 яшьлек Женя Миронов ясаган. Ул – Россиядә һәм чит илләрдә 25-тән артык шәхси күргәзмә авторы. InArt аналитик агентлыгы версиясе буенча ул ике тапкыр Россиянең иң яхшы яшь рәссамнары унлыгына керде.
Адрес: «БИЗОN» галереясы, Бауман урамы, 44/8. Керү 150 сум, балаларга һәм пенсионерларга – бушлай, студентларга – 100 сум.
Ташламалы бәядән сатулар (0+)
26-нчы сентябрь 12:00 сәгатьтән 18:00 сәгатькә кадәр
Бу якшәмбедә казанлыларны үзләренең көзге гардеробларын яңартырга чакыралар. Шәһәр халкына ташламалы бәяле киемнән тыш, Казан осталарының эшләнмәләре дә тәкъдим ителәчәк. Шулай ук теләүчеләрнең мастер-классларда катнашу һәм лекцияләр тыңлау мөмкинлеге булачак. Моннан тыш, мәйданчыкта фудкорт урнашачак.
Адрес: «Спартак Спейс», Спартак урамы, 2б, 4-нче кат.
«Яшел фитнес» проектының җәйге сезонын ябу (6+)
26-нчы сентябрь 15:00 сәгатьтә
Паркта дәресләрнең җәйге сезоны бу ял көннәрендә мини-бәйрәм белән тәмамланачак. Казанлылар өчен зумба һәм джампинг буенча дәресләр үткәрәчәкләр.Нәни килүчеләр крио-шоуда һәм башка чараларда катнаша алачак. Шулай ук казанлыларны Just Brass тынлы музыкаль төркеме һәм популяр башкаручы Элвин Грей чыгышы белән концерт көтә.
Адрес: Горький исемендәге Үзәк мәдәният һәм ял паркы, Ершов урамы, 1. Керү ирекле.
Шулай ук укыгыз
-
25.07.2025, 16:54 -
25.07.2025, 16:19 -
25.07.2025, 14:57 -
25.07.2025, 13:54