ТР башкаласы аэропорты җәйге расписаниегә күчте

Кемерово, Якутск, Улан-Удэ һәм Нальчик юнәлешләрендә рейслар ачу планлаштырыла

Фото: Екатерина Красуцкая

Казан аэропорты җәйге расписаниегә күчте, ул 26 нчы октябрьгә кадәр гамәлдә булачак. Әлеге чорда яңа рейслар ачу көтелә.

Эчке юнәлешләрдә Nordwind Airlines авиакомпаниясе апрель һәм май айларында Кемеровога һәм Якутскига рейслар җибәрәчәк, Улан-Удэга да туры очышлар булачак. Җәй көне авиакомпания Калининградка очышлар санын арттырачак, бу маршрутта беренче тапкыр тәүлегенә дүрт-биш рейс башкарылачак.

Мәскәү, Санкт-Петербург, Махачкала, Грозный, Владикавказ, Сочи, Минераль Сулар, Томск, Омск, Иркутск, Таулы Алтай, Красноярск, Мурманск, Новокузнецк, Барнаул, Сургут, Самара, Яңа Уренгой, Ярославль, Пермь, Түбән Новгород, Оренбург, Петрозаводск, Киров, Саранск, Тобольск, Әстерхан, Екатеринбург юнәлешләрендә очышлар дәвам итәчәк.

«ЮВТ АЭРО» авиакомпаниясе – Калугага, Red Wings – Нальчикка, ә «Икар» Волгоградка рейслар ача. Гомумән, җәйге расписание Россия буенча ким дигәндә 46 юнәлешне үз эченә алачак.

Халыкара юнәлешләрдә тугыздан артык авиакомпания Анталиягә очачак. Шулай ук казанлылар Бодрумга, Даламанга һәм Истанбулга бара алачак.

Шри-Ланкага һәм Пхукетка рейслар Red Wings һәм Azur Air компанияләре тарафыннан башкарылачак. Очышларга киң фюзеляжлы авиалайнерлар җәлеп ителер дип көтелә.

Мисырга очышлар белән «Россия», Red Wings, Azur Air һәм «Урал авиалинияләре» компанияләре шөгыльләнәчәк. Гарәп лоукостерлары Flydubai һәм Air Arabia Дубайга һәм Шарджага рейслар оештырачак.

Чәршәмбе һәм якшәмбе көннәрендә казанлылар Белградка оча алачак.

Моннан тыш, Наманганга рейслар җибәрү планлаштырыла, Минск, Тбилиси, Ереван, Ташкент, Сәмәрканд, Ашхабад, Баку, Актүбә һәм Астанага очышлар дәвам итәчәк, дип хәбәр иттеләр ТР башкаласы аэропорты матбугат хезмәтендә.

Шулай ук укыгыз

Барлык яңалыклар