А.Песошин: «WorldSkills-2019 чемпионатын югары дәрәҗәдә оештыру өчен Казанның бөтен инфраструктурасы бар»

А.Песошин: «WorldSkills-2019 чемпионатын югары дәрәҗәдә оештыру өчен Казанның бөтен инфраструктурасы бар»

<p> (Казан шәһәре KZN.RU, 26-нчы апрель). Казанда WorldSkills-2019 чемпионатын югары дәрәҗәдә оештыру өчен бөтен кирәкле инфраструктура бар. Бу хакта кичә ТР Премьер-министры Алексей Песошин 2019 елда Казанда WorldSkills стандартлары буенча 45-нче дөнья һөнәри осталык чемпионаты алдыннан чит илләрнең гадәттән тыш һәм тулы вәкаләтле илчеләрен рәсми кабул итү кысаларында белдерде.<br> </p> <p> «Татарстан Республикасы Президенты һәм Хөкүмәте исеменнән Казанда WorldSkills-2019 дөнья чемпионатын уздыруга карата күрсәтелгән ышаныч өчен рәхмәт белдерәсем килә. Безнең өчен мондый масштаблы чараны оештыру - зур дәрәҗә һәм җаваплылык», - диде А.Песошин үз чыгышында. </p> <p> Ул хәбәр иткәнчә, республикада дөнья чемпионатын үткәрү өчен махсус, барлык халыкара таләпләргә җавап бирә торган «Казан Экспо» күргәзмә үзәге төзелгән. </p> <p> Татарстан Республикасы Премьер-министры шулай ук WorldSkills Kazan-2019 чемпионатының бөтен дөньяда һөнәри белем бирү системасы үсешенә яңа этәргеч бирәчәген билгеләп үтте. «Чемпионатның барлык чаралары да иң югары дәрәҗәдә узар, дип ышанам. Казанга рәхим итегез!»- дип өстәде А.Песошин. </p> <p> Мәскәүдә узган рәсми кабул итү кысаларында чара кунакларына дөнья чемпионаты турында гомуми мәгълүмат тәкъдим иттеләр, шулай ук эшлекле программа структурасы турында сөйләделәр, дип хәбәр итә ТР Президентының матбугат хезмәте. </p> <p> Чарада Россия Федерациясе Хөкүмәте Рәисе урынбасары Татьяна Голикова, Россия мәгариф министры Ольга Васильева һәм башкалар катнашты. </p>

2019-04-26T08:02:23+0300