9 майда казанлылар «Җиңү тәрәзәсе» акциясенә кушыла алачак

Илебез халкына төш вакытында, үз фатирлары балконына чыгып, Давид Тухмановның «Җиңү көне» җырын башкарырга тәкъдим итәләр.

(Казан шәһәре KZN.RU, 6-нчы май). 9-нчы майда казанлылар «Җиңү тәрәзәсе» бөтенроссия патриотик акциясенә кушыла ала. Ил халкына нәкъ төш вакытында тәрәзә янында яки үз фатирының балконына чыгып, Давид Тухмановның «Җиңү көне» җырын башкарырга тәкъдим итәләр.

Проектка спортчылар, актерлар, сәяси эшлеклеләр һәм башкалар кушылыр, дип көтелә. Чыгышны видеога яздырырга һәм социаль челтәрләрдә #окнопобеды хештэгы белән чыгарырга мөмкин, дип хәбәр итә ТР Мәдәният министрлыгы матбугат хезмәте.

Акция РФ Мәдәният министрлыгы ярдәме белән «Духовое общество» тынлы оркестрлар һәм тынлы һәм бәрмә уен коралларында башкаручылар ассоциациясе инициативасы белән, Россия милли музыка музее, В.Д.Поленов исемендәге Россия дәүләт халык иҗаты йорты, Социаль проектларны үстерү үзәге катнашында үткәрелә.

Исегезгә төшерәбез, быел Казанда 9-нчы майда Җиңү парады һәм бәйрәм салюты булмый - чаралар уңай эпидемиологик шартлар урнашкач, соңрак вакытка күчерелә. Әмма Җиңү көнен бәйрәм итү барыбер булачак - бөтен ил өчен истәлекле датага мәдәни һәм күңел ачу программасы әзерләнде, аны онлайн режимда карарга мөмкин булачак.

Бәйрәмнең үзәк мәйданчыгы гадәттәгечә Җиңү паркы булачак. Бәйрәмгә Совет солдатына һәйкәл ачылачак, аның прообразы Рейхстаг өстендәге әләмне урнаштыруда катнашкан Гази Заһитов булды.

Җиңү көнендә шулай ук «Авторетроклуб-21» республика иҗтимагый оешмасында катнашучылар сугыш еллары автомобильләрендә бәйрәм йөреше ясаячаклар.

Моннан тыш, Казанда дистанцион режимда «Үлемсез полк» акциясе актив бара. Инде хәзер үк теләге булган һәркемнең онлайн-йөрешкә кушылу мөмкинлеге бар.