9 майда Татарстанның Дәүләт камера хоры «Җиңүгә кадәр 15 җыр» онлайн-концерты белән чыгыш ясаячак

«Җиңүгә кадәр 15 җыр» проекты коллектив тарафыннан булдырылган оригиналь аранжировкалардан тора.

(Казан шәһәре KZN.RU, 8-нче май). 9-нчы майда Татарстан Республикасы Дәүләт камера хоры Сәйдәшев исемендәге Зур концертлар залында онлайн-концерт белән чыгыш ясаячак, аны трансляцияләүне барлык теләүчеләр карый алачак. Концерт программасын «Җиңүгә кадәр 15 җыр» проекты язмалары тәшкил итәчәк, алар 25-нче апрельдән камера хоры сайтында һәм социаль челтәрләрдә бастырылды.

«Җиңүгә кадәр 15 җыр» проекты коллектив тарафыннан булдырылган оригиналь аранжировкалардан тора. Хор артистларыннан тыш анда Алинә Шәрипҗанова, Айдар Сөләйманов, Илүсә Хуҗина, «Волга-Волга» төркеме, Россия балалар хорында катнашучылар һәм җәмәгать эшлеклеләре катнаша.

Чыгыш хор җитәкчесе, Татарстанның атказанган сәнгать эшлеклесе Миләүшә Тәминдарова шәрехләре белән үрелеп барачак.

Хор Россия һәм Татарстан гимннарын, шулай ук Б.Окуджаваның «Десантный батальон», А.Островскийның «Солнечный круг», Р.Хозакның «От героев былых времен», сугыш чоры җырларыннан попурри («Смуглянка», «Катюша», «Казаки», «Песенка фронтового шофера»), И.Матвиенконың «Песня про коня», «От Волги до Енисея», «Комбат», «Жить», Д.Тухмановның «Как прекрасен этот мир», «День Победы», В.Вакуленконың «Сансара», У.Рәшитовның «Туган як» җырларын, шулай ук «Калинка» һәм «Туган тел» җырларын башкарачак.

Трансляцияне Сәйдәшев исемендәге Дәүләт зур концертлар залы сайтында, Youtube-каналда һәм инстаграмда карарга мөмкин булачак. 21.00 сәгатьтә башланачак, дип хәбәр итә С.Сәйдәшев исемендәге Дәүләт Зур концертлар залы матбугат хезмәте.

Исегезгә төшерәбез, гадәттәгечә, 9-нчы майда, Җиңү көнендә, республикада «Җырлый торган Казан» проектының җыелма хоры яңгырый иде, ул профессиональ, һәвәскәр, студентлар һәм балалар хорларыннан 10 меңгә кадәр башкаручыны берләштерә. Быел бәйрәм концерты коронавирус пандемиясе аркасында яңа форматта уздырыла.

Исегезгә төшерәбез, 9-нчы майда казанлылар шулай ук онлайн режимда «Авторетроклуб-21» республика иҗтимагый оешмасы катнашучыларының бәйрәм йөрешен күрә алачак, #Ишегалдыбеләнҗырлыйбыз, «Җиңү тәрәзәләре» акцияләренә кушыла алачак.

Шулай ук укыгыз

Барлык яңалыклар