8 нче июньдә «Черек күл» паркында «Китап-фест» узачак

Килүчеләр буккроссингта катнаша, оркестр музыкасын тыңлый, әдәби китаплар сатып ала һәм китап кыстыргыч ясый алачак.

Фото: Денис Гордийко

(Казан шәһәре KZN.RU, 7 нче июнь). Иртәгә, 8 нче июньдә, Казанның «Черек күл» паркында «Китап-фест» узачак. Чара кунаклары, шул исәптән нәниләр өчен мәдәни-агарту күңел ачу программасы әзерләнгән.

Китап бәйрәмендә La Primavera Казан камера оркестры, татар шагыйрьләре – Рифат Сәлахов, Йолдыз Миңнуллина, Камилә Латыйпова һәм башкалар, шулай ук «Казан» журналы баш мөхәррире Альбина Әпсәләмова чыгыш ясаячак.

Фестивальдә мастер-класслар оештырылачак, анда барлык теләүчеләр дә китап кыстыргыч, буклет яки открытка ясый алачак. Шәһәр халкы тәгәрмәчле китапханәдә иң яхшы басмалар белән танышачак, җәйге уку залында шулай ук китаплар һәм журналлар тәкъдим ителәчәк. Фестивальгә буккроссинг кысаларында башкалар белән алмаштыру өчен үз китапларыңны алып килергә мөмкин булачак. Моннан тыш, паркта нәшриятларның продукцияләре күргәзмәсе һәм сату эше оештырыла.

Фестивальгә килүчеләр «Балалар мәйданчыгы» аллеясында уйный алачак. Аларны интеллектуаль уеннар, балалар әкиятләрен рольләргә бүлеп уку, әдәби викторина һәм квестлар белән интерактив программа көтә.

«Книга-фест» 17:00 сәгатьтә башлана, дип хәбәр иттеләр Казан Башкарма комитетының Мәдәният идарәсендә.

Шулай ук укыгыз

Барлык яңалыклар