Казанның 650 укытучысы һәм тәрбиячесе өчен татар телен өйрәнүнең нәтиҗәле ысуллары буенча семинар үткәрелде

РФ Хөкүмәтенең мәгариф һәм мәдәният өлкәсендәге премиясе лауреаты Дмитрий Петров спикер булды

Фото: Казан Башкарма комитетының Тел культурасы өлкәсендә милли сәясәтне гамәлгә ашыру бүлеге

Казанның Совет районы 11 нче күп профильле лицеенда балалар бакчалары укытучылары һәм тәрбиячеләре өчен татар телен өйрәнүнең нәтиҗәле ысулларына багышланган семинар үткәрелде. Очрашуда 650 кеше катнашты.

Спикер булып РФ Хөкүмәтенең мәгариф һәм мәдәният өлкәсендәге премиясе лауреаты, чит телләрне тиз өйрәнү өчен китаплар һәм дәреслек-тренажерлар авторы Дмитрий Петров чыгыш ясады. Чарада шулай ук шәһәр Башкарма комитеты җитәкчесе урынбасары Гүзәл Сәгыйтова һәм Мәгариф идарәсе башлыгы Ирек Ризванов та булдылар.

Мәйданчыкта катнашучылар тәҗрибә уртаклашты. Авиатөзелеш районының 117 нче мәктәбенең туган тел укытучысы Кадрия Нәҗмиева сөйләгәнчә, балаларны кызыксындыру өчен уен методикасын кулланырга кирәк, мәсәлән, бергәләшеп караокеда җырларга һәм йомшак уенчыклар белән уйнарга.

«Соңгы вакытта мин күбрәк Россия телләре белән шөгыльләнә башладым. Дүрт ел элек татар теле буенча проект булды. Узган ел мин калмык теле методикасы белән шундый ук курс ясадым. Минемчә, теләсә кем ирекле белергә тиеш һәм белергә мөмкин булган телләр санының чиге юк. Дөрес алгоритм һәм механика табу бик мөһим», - дип уртаклашты Дмитрий Петров.

Семинар Казан Мэриясе һәм шәһәр Башкарма комитетының Мәгариф идарәсе тарафыннан ТР Рәисе каршындагы республикада яшәүче халыкларның татар телен һәм туган телләрен саклау, үстерү мәсьәләләре буенча комиссия ярдәме белән оештырылды.

ТР башкаласы Башкарма комитетының Тел культурасы өлкәсендә милли сәясәтне гамәлгә ашыру бүлегендә хәбәр итүләренчә, киләсе семинар апрельгә планлаштырылган. Анда татар теле һәм әдәбияты укытучылары чакырылачак.

Шулай ук укыгыз

Барлык яңалыклар