4-нче гыйнвар Казанда: керлинг буенча тренировка, Кыш бабай белән очрашу һәм кулдан ясалган чаналар фестивале

Шәһәр халкы һәм кунаклары ял көннәрен паркларда һәм скверларда үткәрә алалар.

(Казан шәһәре KZN.RU, 4-нче гыйнвар). Бәйрәм яллары дәвам итә, аларны Казан халкы һәм кунаклары кызыклы һәм сәламәтлек өчен файдалы итеп үткәрә алалар. Барлык теләүчеләр саф һавада - шәһәр паркларында һәм скверларында узачак чараларга кушыла ала.

12.00 сәгатьтә Горький исемендәге паркта «Казан чаналары» фестивале узачак. Шул ук вакыт аралыгында «Ак чәчәкләр» бульварындагы «Кыш Бабай остаханәсе»ндә мастер-класс узачак.

Горки-Әмәт урманында 12.00 сәгатьтә Яңа ел спорт чарасы башлана.

«Кыш Бабай һәм Кар кызы» күңел ачу программасы Тинчурин исемендәге скверга килүчеләрне көтә, башлана - 12.00 сәгатьтә.

17.00 сәгатьтә барлык теләүчеләрне керлинг буенча ачык тренировкага чакыралар, ул «Черек күл» паркында узачак. Шул ук вакытта Яңа ел бәйрәме Казан ипподромы территориясендә дә башланачак.

Көн ахырына кадәр шәһәр паркларында уеннар, конкурслар белән бәйрәм программалары планлаштырылган: Мир урамы буенча урнашкан паркта (Дәрвишләр бистәсе), «Сосновая роща» һәм «Калейдоскоп» паркларында бәйрәм 17.00 сәгатьтә, ә «Крылья Советов» паркында 18.00 сәгатьтә башлана.

Шәһәрнең үзәк чыршысы янында бәйрәм чаралары 17.00 сәгатьтән 19.00 сәгатькә кадәр узачак.

Исегезгә төшерәбез, KZN.RU порталында «Казанда Яңа ел – 2020» бүлеге эшли. Биредә бәйрәмнәрдәге мәдәни афиша, «Паркларда кыш» программасы белән танышырга мөмкин. Шулай ук әлеге бүлектә Яңа ел бәйрәмнәрендә җәмәгать транспортының, медицина оешмаларының, хоккей тартмаларының, шугалакларның һәм чаңгы трассаларының эше турында мәгълүмат урнаштырылган.