30 августта Татарстан башкаласында алтынчы тапкыр Kazan City Racing автотамашасы узачак

Программада - Harley-Davidson клубы мотоциклчылары кәрваны узу, дрифтерлар, мотокаскадерлар һәм стантрайдинг йолдызлары чыгышлары.

(Казан шәһәре KZN.RU, 22-нче август). 30-нчы августта Татарстан башкаласы үзәгендә алтынчы тапкыр Kazan City Racing автотамашасы узачак. Ул Шәһәр көнендә төп күңел ачу вакыйгаларының берсе булачак.

Быел Казан халкын һәм кунакларын яңа тамаша программасы көтә, аны Harley-Davidson клубы мотоциклчылары кәрваны ачачак. Меңьеллык мәйданында тантаналы рәвештә «Кызыл Кремльдән – Ак Кремльгә» мотоузышы тәмаланачак. Анда Мәскәүдән Казанга киләчәк 100-гә якын байкер катнашачак, алар 800 чакрымнан артык юл үтеп киләчәк. Мотоузыш Татарстан Республикасы Көненә багышланачак һәм юлда куркынычсызлык кагыйдәләрен пропагандалауга юнәлтеләчәк.

Автотамашада Россиянең һәм дөньяның иң көчле дрифтерлары хедлайнерлар булачак. Алар арасында - Evil Empire командасыннан Сергей Кабаргин дрифт өчен махсус төзелгән бердәнбер Flanker F гиперкарында. Дрифтта Россия һәм халыкара ярышларда күп тапкырлар катнашучы һәм призер Никита Шиков үз осталыгын күрсәтәчәк. Аларга мотокаскадерлар һәм стантрайдинг йолдызлары Марат Канкадзе, Legend Stunt Team командасыннан Юрий Верховников һәм Григорий Талдыкин да кушылачак.

Чарада беренче тапкыр классик автомобильләрдә боҗра узышларында чыгыш ясаучы «Наследие» командасы катнашачак. Команда Казанга иске алман узыш коллекциясеннән реставрацияләнгән Mercedes һәм BMW спорт автомобильләре алып киләчәк.

Автотамашада Яр Чаллының легендар «КАМАЗ-Мастер» командасы катнашачак, ул быел дрифтер Никита Шиков белән бергә махсус программа әзерләгән, дип хәбәр итә Kazan City Racing матбугат хезмәте.

Шулай ук укыгыз

Барлык яңалыклар