Тукталып торыш... Казанда 6, 8, 9 һәм 12 нче троллейбуслар хәрәкәте вакытлыча туктатылды

Денис Гордийко фотосы

Татарстан башкаласында 6, 8, 9 һәм 12 нче троллейбус маршрутлары хәрәкәте вакытлыча тукталды. Әлеге күренеш Мәүлетов урамы, 17 адресы буенча челтәрдә электр энергиясен транспортка тапшыруны тәэмин итүче электр җайланмасына зыян килү белән бәйле.

Урында предприятиенең авария хезмәте эшли, дип хәбәр итә «Метроэлектротранс» муниципаль унитар предприятиесе матбугат хезмәте.

Исегезгә төшерәбез, «Метроэлектротранс» муниципаль унитар предприятиесе 132 чакрымга сузылган трамвай юлына, 313 чакрым озынлыктагы трамвай һәм троллейбусларның контакт челтәренә хезмәт күрсәтә.

Башкарылган эшләргә карамастан, җир өсте электр транспортының юлларын, кече станцияләрен һәм кабельләрне яңартуга 9 миллиард сум чамасы акча таләп ителә.

Предприятиенең энергия хуҗалыгы хезмәте эшчеләре көн саен җир өсте электр транспорты эшен тәэмин итә торган кабель линияләрен һәм электр белән туендыра торган челтәрләрне төзекләндерә. Хәзерге вакытта шәһәрдә хәрәкәт итүче барлык составны электр белән туендыра торган кече 30 станция эшли. Шул ук вакытта инфраструктура шактый тузган булып санала: 131 чакрым контакт челтәрен, 35 чакрым кабель линиясен капиталь төзекләндерергә кирәк, ди белгечләр. Шулай ук электр белән туендыра торган 4 кече станцияне реконструкцияләү ихтыяҗы бар.

UPD: Хәрәкәт торгызылган.

Шулай ук укыгыз

Барлык яңалыклар