27 сентябрьдә Казанда хәйрия хоккей матчы узачак

«Хоккей - һәркем өчен» проектының хәйрия матчын Төнге хоккей лигасы уенчылары уздырачак.

(Казан шәһәре KZN.RU, 19-нчы сентябрь). 27-нче сентябрь көнне мөмкинлекләре чикләнгән балалар профессионаллар һәм хоккей яратучылар белән бергә «Татнефть-Арена» бозына чыгачак. «Хоккей - һәркем өчен» проектының хәйрия матчын Төнге хоккей лигасы уенчылары уздырачак.

Матч вакытында «Игелекле эшләр көне» хәйрия фонды карамагындагы 20 бала һәм танылган хоккейчылар, иптәшләрчә очрашуда катнашу өчен, төп боз аренасында очрашачак. Махсус коляскада йөрергә мәҗбүр булган һәр баланың ышанычлы штурманы - Төнге лиганың «40+» дивизионы уенчылары булачак. Бала һәм спортчы бердәм уен берәмлегенә әйләнәчәкләр. 10 дуэттан торган ике команда матчны – 15-шәр минутлык ике периодны уйнаячак.

Матчтан соң балалар хоккейчыларның автографларын ала алачак. Моннан тыш, матч нәтиҗәләре буенча, хоккейчылар бүлеп биргән акчаларга «Игелекле эшләр көне» фонды карамагындагыларга «уңайлы тормыш өчен» махсус урындыклар сатып алачак.

Иптәшләрчә матч 19.30 сәгатькә планлаштырылган, дип хәбәр итә «Игелекле эшләр көне» хәйрия фонды матбугат хезмәте.

Шулай ук укыгыз

Барлык яңалыклар