81 нче җиңел атлетика эстафетасы маршруты Казан Кремле аша узачак

27 нче апрельдә үзәктә хәрәкәт өчен берничә урам ябылачак.

Фото: Казан шәһәре KZN.RU

(Казан шәһәре KZN.RU, 26 нчы апрель). 27 нче апрельдә Казанда Россия Федерациясе Спорт министрлыгының 100 еллыгына багышланган «Татарстан Республикасы» газетасы призларына 81 нче җиңел атлетика эстафетасы узачак.

Эстафета маршруты Кремль урамы буенча (КФУның төп бинасыннан), шул исәптән «Казан Кремле» музей-тыюлыгы территориясе буенча узачак. Спорт бәйрәме 14:00 сәгатьтән 16:00 сәгатькә кадәр планлаштырылган. Эстафетада катнашучыларны 13:30 сәгатьтә җыя башлаячаклар, дип хәбәр итә Казан Башкарма комитетының Физик культура һәм спорт комитеты.

Казанлыларны бу көнне төрле иҗат коллективлары чыгышлары белән бай мәдәни программа көтә. Шулай ук «Игелекле Казан» хәйрия йөгереше узачак, анда шәһәрнең профессиональ спорт клублары уенчылары, оешма җитәкчеләре һәм сәламәтлек мөмкинлекләре чикләнгән балалар катнашачак. Җыелган барлык акчалар «Игелекле Казан» автоном коммерцияле булмаган оешмасы ярдәм фондына тапшырылачак.

Эстафета уздырылган көнне 13:00 сәгатьтән 17:00 сәгатькә кадәр хәрәкәт өчен берничә юл ябылачак: Кремль урамы тулысынча – Кремль урамыннан «Уникс»ка кадәр, шулай ук Лобачевский, Астрономия, Кави Нәҗми, Муса Җәлил һәм Чернышевский урамнарындагы участоклар.

Шулай ук укыгыз

Барлык яңалыклар