26 декабрьдә Казанда шәһәрнең төп чыршысы ачыла

Яңа ел мәйданчыгы ачылган көнне шәһәр халкын һәм кунакларын бай эчтәлекле күңел ачу программасы көтә, ул бәйрәм салюты белән тәмамланачак.

(Казан шәһәре KZN.RU, 25-нче декабрь). Иртәгә, 26-нчы декабрьдә, «Казан» Гаилә үзәге янында Татарстан башкаласының төп чыршысы ачылачак. Яңа ел мәйданчыгы ачылган көнне шәһәр халкын һәм кунакларын бай эчтәлекле күңел ачу программасы көтә, ул бәйрәм салюты белән тәмамланачак.

Россиянең иң биек яңа ел чыршысы топ 3-легенә кергән 35 метр биеклектәге яшел гүзәлне 93 меңнән артык төрле куәттәге светодиод, тулы әйләнештәге 12 яктылык пушкасы һәм 640 якты гирлянда бизиячәк.

Касә территориясендә боз шәһәрчеге дә урнашкан. Ул 5 текә боз таучыгын, Кыш Бабай, Кар кызы, тәхет, аҗдаһа, боз кристалллары, боз лабиринты боз скульптураларын, «Тантамарески» панносын, шулай ук кардан ясалган шәһәрчекне үз эченә ала. Төп сәхнәдә сәнгать осталары катнашында концерт программасы булачак. Биредә үк шәһәр символикасы һәм иллюминация белән бизәлгән бәйрәм сәүдә рәтләре дә урнашачак. Боз шәһәрчегенә килүчеләр өчен боз сарае рәвешендәге җылыну бүлмәсе каралган, анда чәй эчәргә мөмкин булачак.

Казанның Касә янында урнашкан төп чыршысын ачу бәйрәме 26-нчы декабрьдә 16.00 сәгатьтә башлана. Бу көнне Сибгат Хәким урамы буенча транспорт хәрәкәтен 15.00 сәгатьтән 23.00 сәгатькә кадәр чикләү планлаштырыла.

Шулай ук укыгыз

Барлык яңалыклар