22 августта Казанда Бөек Ватан сугышы темасына интерактив театраль куелыш узачак

Интерактив спектакль Бөек ватан сугышы елларында казанлыларның язмышы турында сөйләячәк.

(Казан шәһәре KZN.RU, 21-нче август). 22-нче августта Татарстан башкаласында «Балалар академиясе» балалар иҗаты үзәге залында (Пионер ур., 10) «Хәрби монологлар. Казан 1941-1945» ачык спектакль узачак. Интерактив спектакль Бөек ватан сугышы елларында казанлыларның язмышы турында сөйләячәк.

Артистларның дүрт монологында тамашачыларга Бөек Ватан сугышы чорында Казан урамнары турында реаль тарихлар ачылачак.

Спектакль өчен декорацияләрне ДЦП белән шөгыльләнүче балалар өчен Татарстан Республикасы Рәссамнар берлеге белгече Екатерина Манько җитәкчелегендәге картиналар өстендә эшләгән 4-нче номерлы интернатта тәрбияләнүчеләр әзерләгән.

Спектакльдә Казан яшь тамашачылар театры һәм Г.Кариев исемендәге Татар дәүләт яшь тамашачы театры, Болактагы театр актерлары, Казан театр училищесы студентлары катнашачак.

Спектакль «Иман Нуры» мәчете хәйрия проекты кысаларында куелган һәм Казанның Совет районы администрациясе, ТР Рәссамнар берлеге, ТР Театр әһелләре берлеге, Казан театр училищесы ярдәмендә гамәлгә ашырылган. Аны беренче тапкыр тамашачыларга Казанның Актерлар йортында узган елның май аенда тәкъдим иттеләр. Бу юлы куелыш Казан шәһәр Думасы депутаты Илья Вольфсон ярдәме белән узачак.

Спектакль 16.00 сәгатьтә башлана, дип хәбәр итә оештыручылар. Барлык теләүчеләр өчен керү ирекле.

Шулай ук укыгыз

Барлык яңалыклар