21 сентябрьдә Казанда «Мәдәният мозаикасы» этноконфессиональ фестивале узачак

Программада – милли костюмнар парады, бию мастер-класслары, этномаркет, концерт һәм мода күрсәтү.

(Казан шәһәре KZN.RU,17-нче сентябрь). 21-нче сентябрьдә Кремль яр буенда «Мәдәният мозаикасы» республика этноконфессиональ фестивале узачак. Программада – милли костюмнар парады, бию мастер-класслары, этномаркет, концерт һәм мода күрсәтү.

13.00 сәгатьтә фестиваль Казан Кремленең Спас манарасыннан Кремль яр буена кадәр узачак милли костюмнар парады белән ачыла. Чарага теләге булган һәркем кушыла ала - моның өчен милли киемнәргә киенергә кирәк.

Кремль яр буенда 14.00 сәгатьтә республиканың танылган милли коллективлары һәм башкаручылары чыгышы белән өч сәгатьлек концерт булачак.

Шул ук вакытта интерактив мәйданчыклар да эшли башлаячак, анда бәйрәм кунаклары өчен милли биюләр һәм халык кәсепләре буенча мастер-класслар уздырылачак. Шулай ук төрле халыкларның традицион уеннары булган «Дөнья яшьләре» балалар мәйданчыгы, этномаркет - халык һөнәрчелеге эшләнмәләре күргәзмә-ярминкәсе, милли ризыклар белән фудкорт һәм креатив фотозоналар эшләячәк.

17.00 сәгатьтә Коми, Марий Эл, Мәскәү һәм Татарстан республикаларыннан яшь этнодизайнчылар коллекцияләрен тәкъдим итү башланачак.

Фестиваль азагында музыкаль нон-стоп узачак - төрле төбәкләрдән килгән танылган этно башкаручылар кунаклар өчен иң яхшы композицияләрне күрсәтәчәкләр. Концерт 18.00 сәгатьтән 21.00 сәгатькә кадәр дәвам итәчәк, дип хәбәр итә Татарстан халыкларының яшьләр ассамблеясе.

Шулай ук укыгыз

Барлык яңалыклар