2 августта Казанда «Ак Барс Арена» янында транспорт хәрәкәте чикләнәчәк

Бу көнне Татарстан Республикасы башкаласында «ЗаБег.РФ» Бөтенроссия ярыммарафоны узачак.

(Казан шәһәре KZN.RU, 30-нчы июль). 2-нче августта Казанда «ЗаБег.РФ» Бөтенроссия ярыммарафоны узачак. Старт «Ак Барс Арена» стадионында биреләчәк. Җиңел атлетика ярышларын әзерләгәндә һәм үткәргәндә стадион янында транспорт хәрәкәте чикләнәчәк. Тиешле карар шәһәрнең Башкарма комитетында имзаланды.

7.30 сәгатьтән 12.00 сәгатькә кадәр транспорт хәрәкәте Сибгат Хәким урамы буенча - Декабристлар урамыннан Ф.Әмирхан проспектына таба хәрәкәт итү юнәлешендә чикләнә (хәрәкәтнең ике юнәлешен туктатып тору).

7.30 сәгатьтән 13.00 сәгатькә кадәр хәрәкәт чикләнәчәк:

Сибгат Хәким урамы буенча - Ф.Әмирхан проспектыннан алып Чистай урамы белән кисешкән урынга кадәр (хәрәкәтнең ике юнәлешен туктатып тору);

Чистай урамы буенча - Сибгат Хәким урамындагы съезддан алып Чистай урамындагы съездга кадәр (хәрәкәтнең өч уң полосасын туктатып тору).

Чистай урамы буенча - Чистай урамыннан «Ак Барс Арена» стадионы тирәли әйләнеш хәрәкәтенә съездга кадәр (хәрәкәтнең өч уң полосасын туктатып тору).

Шулай ук 7.30 сәгатьтән 13.00 сәгатькә кадәр хәрәкәт «Ак Барс Арена» стадионы тирәсендә тулысынча чикләнәчәк.

«ЗаБег.РФ» - синхрон старт белән дөньядагы иң эре ярыммарафон. Бөтен ил буйлап бер үк вакытта 1 чакрым, 5 чакрым, 10 чакрым яки 21,1 чакрым дистанциягә меңләгән кеше старт ала. 2017 һәм 2018 елда ярыммарафон кысаларында Татарстан башкаласы Россиянең йөгерү башкаласы исемен алды.

Чараны барлык санитар-эпидемиологик таләпләрне үтәп оештырачаклар. Ярыммарафон катнашучылары ярышларга битлекләрдә һәм перчаткаларда килергә тиеш. Йөгерү территориясе кулларны дезинфекцияләү чаралары белән тәэмин ителәчәк, керү урынында барысы да температураны үлчәячәк.

Стартта 5 секунд интервал белән 5-әр кеше булачак. Ярыммарафон җанатарларсыз үтәчәк.

Теркәлгән катнашучыларга старт пакетларын бирү 7.00 сәгатьтән 8.30 сәгатькә кадәр үткәреләчәк, беренче йөгерү 8.30 сәгатьтә башлана.

Җиңүчеләрне бүләкләү 12.55 сәгатькә планлаштырылган, дип хәбәр итә Timerman спорт чаралары сериясе матбугат хезмәте.