19-нчы октябрьдә Казанда туган якны өйрәнү һәм шәһәрдә ориентлашу буенча квест узачак

Катнашучылар, махсус карточкалар буенча ориентлашып, шәһәр буенча хәрәкәт итәчәк.

(Казан шәһәре KZN.RU, 18-нче октябрь). 19-нчы октябрьдә Казанда егерменче тапкыр шәһәрдә ориентлашу һәм туган якны өйрәнү буенча Tat-Rus маҗаралы спорт-интеллектуаль уены узачак. Катнашучылар, махсус карточкалар буенча ориентлашып, шәһәр буенча хәрәкәт итәчәк.

Команда уены квест формасында уза. Катнашучыларга биремнәр язылган карточкалар биреләчәк, аларга җаваплар шәһәрнең билгеле бер урынына кадәр юл күрсәтәчәк. Үз хәрәкәтләрен уенчылар маршрут кәгазендә билгеләп барачак. Команданың бурычы - иң күп күләмдә контроль пунктларны алу.

Уен өч төрле категориядә узачак: «Көнгерә» (гаилә), «Шүрәле» (иң катлаулы) һәм «Дәрвиш» (иң популяр, тулысынча җәяү үтелә). Биремнәргә дөрес җавап бирү өчен, шәһәр тарихын белү генә түгел, тарихи башваткычларны хәл итүдә логика күрсәтү дә кирәк.

Шулай ук старт ноктасында макулатура һәм файдаланылган батарейкаларны җыю оештырылачак, алар эшкәртүгә җибәреләчәк. Теләгән һәркем икенчел чималны тапшыра һәм моның өчен өстәмә баллар ала алачак.

Квест Петров исемендәдге паркта старт ала, беренче команда маршрутка 10.00 сәгатьтә чыгачак, дип хәбәр итә Рус географик җәмгыятенең Татарстан Республикасындагы төбәк бүлеге.

Шулай ук укыгыз

Барлык яңалыклар