18 июль көнне Горки-Әмәт урманында «Яңа дустыңны тап» акциясе узачак

Чарада казанлылар приюттан эт сайлый һәм дүртаяклыларны тәрбияләү буенча киңәшләр ала алачак.

Фото: Денис Гордийко

(Казан шәһәре KZN.RU, 14-нче июль). 18-нче июль көнне Казанның Горки-Әмәт урманында «Яңа дустыңны тап» акциясе узачак – шәһәр халкы дүртаяклылар белән аралаша, үзенә йорт хайваны сайлый һәм ветеринария табиблары белән киңәшләшә алачак.

Якшәмбе көнне 11:00 сәгатьтән 14:00 сәгатькә кадәр волонтерлар казанлыларны таныш булмаган этләр белән аралашырга, хайваннарның үз-үзләрен тотышы үзенчәлекләрен аңлатырга, таныш булмаган этне ничек итеп ияләштерергә һәм тискәре агрессив реакцияләрдән ничек качарга икәнен өйрәтәчәк, ә ветеринария табиблары барлык теләүчеләргә хайваннарны тәрбияләү буенча тәкъдимнәр бирәчәк. Моннан тыш, паркта шәһәр халкы приюттан дусларча, сәламәт, вакциналы һәм стерильләштерелгән этләр белән очрашачак, аларны үз өйләренә ала алачак. Аларга сайлау ясарга белгечләр һәм башка йорт хайваннары хуҗалары ярдәм итәчәк.

Бу акция Казан Мэры Илсур Метшин кушуы буенча Парклар һәм скверлар дирекциясе оештырган беренче чара булачак. Дүртаяклылар катнашындагы чаралар шәһәр халкына үз йорт хайванын табу турында уйланырга һәм бу карарга аңлы рәвештә килергә сәбәп булачак. Киләсе акцияләрне августта Дәрвишләр бистәсендә Сәет-Галиев исемендәге мәдәният йорты янындагы паркта, сентябрьдә – Урицкий исемендәге паркта һәм шәһәрнең башка паркларында үткәрү планлаштырыла.

Шулай ук укыгыз

Барлык яңалыклар