Татарстанның 18,4 мең гаиләсе ел башыннан ана капиталы хисабына торак шартларын яхшырткан

Бу – сертификат чараларын куллануның иң популяр юнәлешләренең берсе.

Фото: Денис Гордийко

(Казан шәһәре KZN.RU, 25 нче ноябрь). Ел башыннан Татарстанның 18,4 меңнән артык гаиләсе ана капиталы акчаларын торак шартларын яхшыртуга юнәлдергән. Бу – сертификат чараларын куллануның иң популяр юнәлешләренең берсе.

Пенсия фонды торак шартларын яхшыртуга гаиләләргә 10 млрд сум яки быел ана капиталын бирүгә юнәлдерелгән барлык акчаларның якынча 95% ын күчерде. Әйтик, 16,1 мең гаилә өлешчә яки тулысынча ана капиталы ярдәмендә кредитны түләгән, торак сатып алуга яки төзүгә беренче кертем керткән. Тагын 2,3 мең гаилә кредитсыз торак шартларын яхшырткан.

Сертификат акчаларын, ана капиталы алган балага өч яшь тулгач, торак шартларын яхшыртуга тотарга була. Төп бурычны яки ипотека буенча беренчел кертемне түләү – искәрмә. Бу очракта капиталны бала тугач яки уллыкка алганнан соң ук кулланырга мөмкин, дип хәбәр итә Пенсия фондының ТР буенча бүлекчәсе матбугат хезмәте.

2020 елның апреленнән ана капиталы ярдәмендә кредитка торак алу өчен гаризаны банкта бирергә мөмкин. Гаризаларны һәм кирәкле документларны Россия Пенсия фондының территориаль органнарына электрон элемтә каналлары буенча банк хезмәткәрләре тапшырачак. Мондый процедура сертификат чараларын куллануны тизләтә.

Шулай ук укыгыз

Барлык яңалыклар