15 нче апрельдә Казанның барлык гыйбадәтханәләрендә һәм монастырьларында бәйрәм гыйбадәтләре узачак

Дин тотучылар өчен махсус җәмәгать транспорты биреләчәк.

Фото: Денис Гордийко

(Казан шәһәре KZN.RU, 10 нчы апрель, Татьяна Марюхова). 15 нче апрельдә Казанның барлык гыйбадәтханәләрендә һәм монастырьларында Пасханы бәйрәм итүгә багышланган төнге гыйбадәтләр узачак. Казан Изге Мәрьям Ана иконасы соборында гыйбадәт 23:00 сәгатьтә башланачак, дип хәбәр итте эшлекле дүшәмбедә ТР башкаласы Башкарма комитетының иҗтимагый оешмалар белән хезмәттәшлек бүлеге башлыгы Илнур Шакиров.

Төнге пасха гыйбадәте тәмамланганнан соң, дин тотучылар өчен махсус җәмәгать транспорты оештырылачак. Биш автобус төнге сәгать 2 дә «Үзәк стадион» тукталышына килеп туктаячак. Тукталышлар пассажирлар таләпләре буенча башкарылачак, автобуслар түбәндәге маршрутлар буенча барачак:

Совет районы юнәлешендә Дәрвишләр торак массивына кадәр;

Совет мәйданы аша Азино-1 торак массивына кадәр;

«10 нчы микрорайон» тукталышына кадәр;

Яңа Савин һәм Авиатөзелеш районнарына;

Киров районына.

Полиция җәмәгать тәртибен һәм дин тотучыларның иминлеген тәэмин итәчәк, дип өстәде Илнур Шакиров.

Искәртеп узабыз, 9 нчы апрельдә Казанның гыйбадәтханәләрендә ел саен үткәрелә торган «Ак чәчәк» хәйрия акциясе узды, шәһәрнең битараф булмаган халкы сәламәтлек мөмкинлекләре чикле балалар өчен акча җыйды.