Казан медицина учреждениеләренә 13,7 мең доза гриппка каршы «Ультрикс Квадри» вакцинасы кайтты

Медицина препараты 6 ае тулган балаларга һәм йөкле хатын-кызларга да рөхсәт ителә.

Фото: Марат Мөгыйнов

(Казан шәһәре KZN.RU, 24 нче август). Казан сырхауханәләренә гриппка каршы «Ультрикс Квадри» вакцинасы кайтты. Шәһәрнең медицина оешмаларында балалар өчен 10 мең доза препарат һәм йөкле хатын-кызлар өчен 3713 доза бар, дип хәбәр иттеләр ТР Сәламәтлек саклау министрлыгының Казан буенча Сәламәтлек саклау идарәсендә.

Дүрт валентлы инактивлаштырылган «Ультрикс Квадри» вакцинасы 6 ае тулган балаларны һәм йөкле хатын-кызларны III триместрда вакцинацияләү өчен туры килә.

Күптән түгел Казан сырхауханәләренә «Совигрипп» препаратының 65 мең дозасы кайтты, ул өлкән халыкны вакцинацияләү өчен кулланыла.

ТР Сәламәтлекне саклау министрлыгының Казан буенча Сәламәтлек саклау идарәсендә вакцинация грипптан һәм аның өзлегүләреннән саклауның иң нәтиҗәле ысулы булып кала, дип искәртәләр. Хәзер прививкалар ясау өчен иң уңай вакыт –иммунитет авырулар санының күтәрелүенә кадәр формалашырга өлгерәчәк.

Шәһәр халкы яшәү урыны буенча сырхауханәләрдә һәм «Южный» сәүдә үзәгендә вакцинация мобиль пунктында прививка ясата ала. Шул ук вакытта гриппка каршы прививкаларны COVID-19 прививкасы белән бер үк вакытта ясатырга була.

Шулай ук укыгыз

Барлык яңалыклар