12 сентябрьдә Werk Казан арт-киңлегендә яңа сәнгать фестивале узачак

Программада - цифрлы чорда сәнгать турында лекцияләр, модульле синтезаторларда уйнау буенча мастер-класс, дискуссия һәм концерт.

(Казан шәһәре KZN.RU, 3-нче сентябрь). 12-нче сентябрьдә Werk Казан арт-киңлегендә «4′33″» яңа сәнгать фестивале узачак. Программада - цифрлы чорда сәнгать турында лекцияләр, модульле синтезаторларда уйнау буенча мастер-класс, дискуссия һәм концерт.

Фестивальдә катнашучылар перформанс һәм медиаарт традицион рәсем, скульптура һәм сурәтләрне ничек кысрыклавы, модульле синтезаторлар ярдәмендә музыка булдыру, көйнең музейлар байлыгына әверелүе һәм XXI гасырда рәссамның роле нинди булуы турында фикер алышачак.

Фестиваль 16.00 сәгатьтә КФУның гомуми фәлсәфә кафедрасы аспиранты Алиса Маркелованың цифрлы чынбарлык чорында сәнгать функцияләре һәм калыпларының трансформация кичерүе турындагы лекциясеннән башлана. 17.00 сәгатьтә теләге булган һәркем инженер, синтезаторлар ясаучы Дани Хроникның мастер-классына кушыла алачак. 18.30 сәгатьтә сугыштан соңгы чор сәнгате тикшеренүчесе Луиза Низамованың «Бу нинди музыка, яки көй музейга ничек килеп эләкте» лекциясе булачак. 20.00 сәгатьтә кунакларны «Рәссамнар хәзер нигә кирәк?» дискуссиясендә көтәләр, модератор булып «Смена» заманча сәнгать үзәге арт-директоры Кирилл Маевский чыгыш ясаячак.

Лекторийдан соң музыкаль программа башланачак. Концертлар белән AIIID, Holofonote һәм Krapiva эксперименталь электроника вәкилләре чыгыш ясаячак. Концерт кичә белән дәвам итәчәк, анда музыка өчен WERKstatt җавап бирәчәк.

Фестивальгә керү Тукай урамы, 115 к6 адресы буенча урнашкан Werk музыкаль арт-киңлегеннән - ирекле, әмма сылтама буенча алдан теркәлү кирәк. Шәхсән катнаша алмаучылар өчен «ВКонтакте» социаль челтәрендәге «Галерея 6, 57» төркемендә турыдан-туры трансляция оештыралар, дип хәбәр итә оештыручылар.

Шулай ук укыгыз

Барлык яңалыклар