11 сентябрьдә Казанда көзге авыл хуҗалыгы ярминкәләре башлана

Бу атнадан башланачак махсус ярминкәләрдә дә шәһәрлеләр кулай бәяләрдән продукция сатып ала алачак.

Фото: Денис Гордийко

(Казан шәһәре KZN.RU, 5-нче август, Ксения Швецова). Казанда 11-нче сентябрьдә традицион көзге авыл хуҗалыгы ярминкәләре башлана, алар декабрьгә кадәр дәвам итәчәк. Әмма түбән бәяләрдән яңа продуктлар сатып алу бу атнадан башлана – 7-нче августтан башлап Татарстан башкаласында кибетләрдәге бәяләр белән вәзгыятьне тотрыкландыру өчен оештырылган махсус ярминкәләр уздырыла башлаячак.

Казан халкы арзан бәядән азык-төлек сатып ала алырлык махсус ярминкәләр шәһәрнең төрле районнарында биш чатыр ярминкә мәйданчыгында үткәреләчәк, дип искәртте Кулланучылар базары комитеты рәисе Руслан Фазылҗанов Казан Мэрия аккаунтында туры эфирда. Яшелчәләргә куелган бәяләр һәм мәйданчыкларның адреслары белән сылтама буенча танышырга мөмкин.

«Җәй башында җиләк-җимеш продукциясенә бәяләр арту булды, шуңа күрә базарда вәзгыятьне тотрыкландыру һәм шәһәр халкын авыл хуҗалыгы продукциясе белән тәэмин итү өчен мондый ярминкәләр оештырыла», – дип аңлатты Кулланучылар базарының комитет рәисе.

Моннан тыш, сентябрьдә, уңыш җыелгач, традицион авыл хуҗалыгы ярминкәләре башлана, алар Татарстан Республикасы Авыл хуҗалыгы һәм азык-төлек министрлыгы белән берлектә оештырыла. Сәүдә 15 мәйданчыкта алып барылыр дип планлаштырыла, әмма аларның саны артырга мөмкин, дип билгеләде спикер.

«Мондый ярминкәләрдә яшелчә, ит, балык продукциясенең киң ассортименты, товарларның азык-төлек булмаган төркемнәре – халык һөнәрләре, җиңел сәнәгать эшләнмәләре тәкъдим ителәчәк, – дип өстәде Р.Фазылянов. - Мәсәлән, каен тузыннан, агач эшләнмәләр, кукмара итекләре һәм башка товарлар сатып алырга мөмкин булачак».

«Гадәттә сентябрьдән декабрьгә кадәр без якынча 16 ярминкә үткәрергә өлгерәбез», – дип билгеләп үтте Кулланучылар базары комитеты рәисе.

Р.Фазылҗанов сүзләренчә, көзге ярминкәләрдә товар бәясе шулай ук җайга салыначак – авыл хуҗалыгы товар җитештерүчеләре Татарстан Республикасы Авыл хуҗалыгы һәм азык-төлек министрлыгы тарафыннан тәкъдим ителгән бәяләрдән продуктлар тәкъдим итәчәк.

Шулай ук укыгыз

Барлык яңалыклар