1 нче мартта Казанда «Киләчәк уеннары – 2024» волонтерлык программасының заявка кампаниясе старт ала

Россия төбәкләреннән һәм башка илләрдән 1500 иреклене җәлеп итү планлаштырыла.

Фото: vk.com/gamesofuture

(Казан шәһәре KZN.RU, 28 нче февраль). 1 нче мартта Бәшир Рәмиев исемендәге IT-паркта «Киләчәк уеннары – 2024» волонтерлык программасының заявка кампаниясен ачу тантанасы булачак. Ул программа конкурсында җиңүче 30 волонтер үзәк вәкилләре белән бөтенроссия семинар-киңәшмәсенең бер өлеше булачак.

Семинар 27 нче февральдән 2 нче мартка кадәр «Волга» яшьләр үзәге территориясендә үткәрелә. Катнашучылар хәрәкәтнең тарихы һәм үсеш планнары белән танышачак, «Киләчәк уеннары» волонтерлык программасын тормышка ашыру бурычлары һәм планы турында фикер алышачак.

«Киләчәк уеннары» халыкара проектының волонтерлык программасы үзәкләрен билгеләүгә бөтенроссия конкурсы агымдагы елның гыйнварында старт алды. 342 оешма аңа карата кызыксыну белдергән, ә 8 федераль округтан 89 катнашучы эксперт комиссиясе бәясенә кертелгән. Нәтиҗәдә, финалда күбрәк төрле тармакларны цифрлаштыруга юнәлтелгән, физик культура һәм спорт өлкәсен дә кертеп, 30 проект тәкъдим ителәчәк, дип хәбәр итә Татарстан Республикасы Спорт министрлыгы матбугат хезмәте.

«Киләчәк уеннары –2024»не оештыру һәм үткәрү өчен барлыгы 1500 волонтер җәлеп итү планлаштырыла. Шулардан 100 кеше – дөньяның төрле илләреннән, 600 кеше – Казан һәм Татарстанның муниципаль районнарыннан, ә 800 кеше Россия Федерациясенең башка төбәкләреннән киләчәк.

Шулай ук укыгыз

Барлык яңалыклар