1 августта Казанда Алексей Кузнецов джаз-триосы һәм Дмитрий Четвергов төркеме чыгыш ясаячак

Казан Кремленең Пушечный дворында «Кремльдә Ольга Скепнер катнашында JAZZ» фестиваленең чираттагы концерты узачак.

(Казан шәһәре KZN.RU, 30-нчы июль). 1-нче августта Казан Кремленең Пушечный дворында «Кремльдә Ольга Скепнер катнашында JAZZ» дигән XIII Халыкара импровизацион музыка фестивале кысаларында чираттагы концерт узачак. Килүчеләр өчен «К.И.М.» джаз-триосы һәм Chetvergov Band коллективы чыгыш ясаячак.

«К.И.М.» – ул танылган совет һәм Россия джазы гитаристы, Россиянең халык артисты Алексей Кузнецов катнашындагы яңа проект. Аның белән бергә Александр Миронов (фортепиано) һәм Игорь Игнатов (бәрмә инструментлар) чыгыш ясаячак.

Ә Chetvergov Band төркеме танылган Россия музыканты Дмитрий Четвергов тарафыннан оештырылган. Коллектив үзенең авторлык инструменталь фьюжн-программасын башкарачак. Джаз-рок, фанк, этно, соул стильләрендә композицияләр яңгыраячак.

Концерт 19.00 сәгатьтә башланачак, дип хәбәр итә фестивальнең матбугат хезмәте.

Шулай ук укыгыз

Барлык яңалыклар