Казанда 398 укучы пилотсыз очкычның проектлау һәм очу нигезләренә өйрәнә

Пилотсыз авиация системалары сыйныфлары алты мәктәптә һәм балаларга өстәмә белем бирүнең бер учреждениесендә ачылган

Фото: Марат Мөгыйнов

ТР башкаласында алты гомуми белем бирү оешмасы һәм бер өстәмә белем бирү учреждениесе базасында очу аппараты белән идарә итү һәм ремонтлау теориясе, шулай ук пилотсыз очу системалары белән идарә итүнең гамәли күнекмәләрен эшләү буенча дәресләр үткәрелә. Барлыгы пилотсыз авиация системалары нигезләренә Казанның 398 укучысы белем ала.

Быелгы уку елында пилотсыз очу системаларын проектлау, ремонтлау һәм очу нигезләре буенча 22 түгәрәк ачылды, дип хәбәр итә шәһәрнең мәгариф идарәсе.

Дәресләр алты гомуми белем бирү учреждениесе базасында үткәрелә: 6 нчы гимназия, 179 нчы гимназия, 35 нче лицей, 83 нче лицей, Лицей-инженерлык үзәге һәм Б.К. Кузенцов исемендәге Казан кадет мәктәбе.

Шулай ук пилотсыз очу аппараты буенча түгәрәкләр В.П. Чкалов исемендәге Шәһәр техник иҗат үзәгендә узачак. Шунда ук авиамодельләштерү буенча ярышлар даими үткәрелә.

Мәгариф оешмаларын җиһазлау «Пилотсыз авиация системалары» милли проекты кысаларында гамәлгә ашырыла.

Исегезгә төшерәбез, узган елның декабрендә Казанда Авиатөзелеш һәм Яңа Савин районнары администрациясе Кубогына юниорлар арасында авиамодель спорты буенча ачык шәһәр ярышлары узды. Анда Казаннан, якындагы шәһәрләрдән һәм күрше төбәкләрдән 7-18 яшьлек 130 бала катнашты. Дроннар ярышында Татарстан Республикасының Авиамодель спорты федерациясе раслаган кагыйдәләр нигезендә F-1N һәм F-9U классындагы авиамодельләр көч сынашты.

Шулай ук укыгыз

Барлык яңалыклар