Бер мең сумнан өч меңгә кадәр: Казанда законсыз ябыштырылган белдерүләр өчен штрафларны катгыйландырырга тәкъдим итәләр

Муниципаль инспекция «эшче йортларга» аерым игътибар итәчәк

Денис Гордийко фотосы

Административ-техник инспекция идарәсе башлыгы Артур Мөхәммәтшин шәһәр Башкарма комитетында узган аппарат киңәшмәсендә реклама белдерүләрен үз белдеклелеге белән ябыштыруга каршы чараларны көчәйтергә тәкъдим итте. Мәгълүмати-басма продукциянең шактый өлеше яктырту баганаларына, светофорларга, юл билгеләренә һәм җәмәгать транспорты тукталышларына урнаштырыла, бу шәһәрнең тышкы күренешен начарайта.

Даими рейдлар үткәрелеп торуга һәм гамәлдәге штрафларга карамастан, хокук бозучылар үз эшчәнлекләрен дәвам итә. Физик затлар өчен каралган санкцияләрнең түбән булуы да моңа сәбәпче, дип саный белгечләр. Бу уңайдан Административ-техник инспекция идарәсе Татарстан Республикасы Административ хокук бозулар кодексының 3.5 маддәсе нигезендә, штраф күләмен, санкцияләнмәгән сәүдә җәзалары белән тиңләштереп, 1 меңнән 3 мең сумга кадәр арттырырга тәкъдим итә.

«Илсур Рәисович, әлеге законга кагылышлы тәкъдим буенча сез уңай карар кабул иткән очракта, Административ-техник инспекция идарәсе, кичекмәстән, Башкарма комитет исеменнән Татарстан Республикасы Дәүләт Советына тиешле гарызнамә белән мөрәҗәгать итәргә әзер. Административ-техник инспекция идарәсе хезмәткәрләре белдерүләрне ябыштыручы оешмалар белән эш алып бара», - дип билгеләп үтте Артур Мөхәммәтшин.

Инспекция шулай ук белдерүләрне күпләп ябыштыру өчен кешеләрне яллый торган оешмалар белән дә эш алып бара. Еш кына моның белән «эш йортлары» – авыр тормыш хәлендәге гражданнарны кабул итә торган приютлар шөгыльләнә. Мондый оешмалар формаль яктан гражданнарны торак һәм туклану белән тәэмин итсә дә, алар өчен табыш ягы өстенлекле булып кала: бәйлелек яки башка кыенлыклар белән очрашкан кешеләр, үзләренә йөкләнгән эшләрне башкарып, эшләп тапкан акчаларының шактый өлешен шундый учреждение вәкилләренә бирә.

Хәзерге вакытта Административ-техник инспекция идарәсе белгечләре «эш йортлары» турында мәгълүмат җыя. Якынча мәгълүматлар буенча, Казанда 100 дән алып 300 гә кадәр шундый объект эшли дип санала.

Билгеләп үтелгәнчә, 2025 ел башыннан идарә белгечләре тарафыннан 3157 административ материал төзелгән – әлеге күрсәткеч узган елның шушы чоры белән чагыштырганда 9 процентка артыграк. 2194 беркетмә административ хокук бозулар өчен рәсмиләштерелгән, бу сан узган елдан ике тапкырга күбрәк булып чыга.

Материалларның күпчелеге тышкы мәгълүматны һәм басма продукцияне тиешсез урыннарда урнаштыру, җир эшләрен башкарганда таләпләрнең, бинаның алгы ягын чистарту һәм төзекләндерү эшләренең вакытында үтәлмәве, шулай ук шлагбаумнарны һәм саклагыч җайланмаларны законсыз урнаштыру буенча хокук бозулар белән бәйле.