«Крылья Советов» паркы сәхнәсендә «Братья Грим» төркеме чыгыш ясаячак

Концерт кышкы «Күрше» фестивале кысаларында узачак

Денис Гордийко фотосы

Бу якшәмбедә, 23 ноябрь көнне, «Крылья Советов» паркында кышкы «Күрше» фестивале кысаларында концерт узачак. «Братья Грим» рок-төркеме чараның хедлайнеры булыр дип көтелә. Коллектив күпләргә яхшы таныш хитларны – «Кустурица», «Ресницы» һәм башка популяр җырларын башкарачак.

Моннан тыш, бәйрәм кунаклары өчен Malsi Music & Ilgiz чыгыш ясаячак. Фестиваль мәйданчыгында шулай ук фотозона, балалар өчен интерактив зона, кайнар эчемлекләр һәм кышкы тәм-томнар белән фудтрак оештырачаклар, дип хәбәр итә Парклар һәм скверлар дирекциясе.

Чара бушлай үткәрелә. Оештыручылар саф һавада матур җырлар тыңлап ял итәргә теләүче барлык шәһәр халкын 14:00 сәгатьтә тамашада көтеп кала.

Чараны Казанның Парклар һәм скверлар дирекциясе белән бергә Татарстан шәһәрләрен үстерү институты үткәрә.

Алдарак «Күрше» фестиваленең кышкы сезонына гаризалар кабул ителә башлавы турында хәбәр ителгән иде. Чаралар ишегалларында һәм иҗтимагый киңлекләрдә оештырылачак. Конкурста катнашучылардан Татарстан халыкларының кышкы спорт төрләренә, мәдәниятен үстерүгә һәм йорт хайваннарына җаваплы мөнәсәбәт тәрбияләүгә кагылышлы фикерләрен юллау сорала. Гаризаны 28 ноябрьгә кадәр теләге булган һәр кеше җибәрә һәм үзенең кышкы активлыгын тәкъдим итә ала.

Шулай ук укыгыз

Барлык яңалыклар