Быел Казанның инвалид балалары булган 440 гаиләсе матди ярдәм алачак

Татарстан башкаласында 6,5 меңнән артык инвалид бала яши

Марат Мөгыйнов фотосы

2025 елда шәһәр бюджетыннан инвалид балалар тәрбияләүче 440 гаиләгә матди ярдәм биреләчәк. Мондый ярдәм ел саен Казан мэры Илсур Метшин кушуы буенча башкарыла. Бу хакта аппарат киңәшмәсендә Казан Башкарма комитеты җитәкчесе урынбасары Азат Абзалов хәбәр итте.

Докладчы билгеләп үткәнчә, агымдагы елда ярдәм күрсәтеләчәк гаиләләр саны арткан. Исегезгә төшерәбез, шәһәрдә 84 меңнән артык инвалид яши, аларның 6,5 меңнән артыгы – балалар.

Гаиләләр өчен матди ярдәм генә түгел, сәламәтлеге чикле балаларга адаптив белем бирү дә мөһим юнәлеш булып тора.

Бүгенге көндә шәһәрнең мәктәпкәчә учреждениеләрендә 1197 инвалид бала тәрбияләнә. 299 учреждениедә 839 төркем ачылган, аларда төрле нозологиядәге 11,5 мең бала белем ала. Әлеге төркемнәрдә мәктәп яшенә кадәр күпчелек балаларның үсеше нормага кадәр үзгәрә, дип билгеләде спикер.

Казанның 54 төп белем бирү оешмасында төрле нозологияле балалар укый, шул исәптән ишетү һәм күрү сәләте, сөйләмнәрендә тайпылыш булганнар һәм аутизм спектры бозылганнар. Муниципаль гомуми белем бирү учреждениеләрендә 1267 инвалид һәм 1782 сәламәтлек мөмкинлекләре чикләнгән бала белем ала.

Казан инклюзив белеме бөтенроссия конкурсларында билгеләп үтелә, диде Азат Абзалов.

Әйтик, Казанның Идел буе районындагы 78 нче «Фарватер» лицее «Иң яхшы инклюзив мәктәп» бөтенроссия конкурсында абсолют җиңүче булды. Моннан тыш, лицей 56 учреждение арасында инклюзив белем бирүне оештыру буенча Россиянең иң яхшы 10 мәктәбе исемлегенә кергән.

«Абилимпикс» илкүләм чемпионатында Казан укучылары бик яхшы нәтиҗәләр күрсәттеләр: Әмир Габдрахманов – «Балта остасы эше»ндә беренче, Зәмирә Гыйззәтуллина – «Башкарма сәнгать»тә икенче, Светлана Бикбулатова «Туризм»да өченче урынны алды.

Татарстан башкаласында шулай ук адаптив инклюзив юнәлешләр белән 49 өстәмә белем бирү үзәге эшли. Бүген аларда 800 дән артык сәламәтлек мөмкинлеге чикләнгән бала шөгыльләнә.

Моннан тыш, укучыларның шәһәрнең һөнәри белем бирү учреждениеләренә уңышлы керүе өчен Татарстан Республикасы рәисенең гражданлык җәмгыятен үстерүгә гранты кысаларында «Аутизм спектры бозылган яшүсмерләр өчен үзбилгеләнүнең рациональ алгоритмы» проекты гамәлгә ашырылды. Ул аутизм спектр бозылган балаларга аңлы рәвештә булачак һөнәрне сайларга һәм укырга керергә әзерләнергә мөмкинлек бирә.

Балаларны уңайлы һәм дөрес адаптацияләү һәм социализацияләү өчен махсус өйрәтелгән укытучылар кирәк. Быел 17 педагог үз-үзләрен тотышына гамәли анализ ясау буенча квалификация күтәрү курслары үтте, шулай ук 53 укытучы «Ментор» проекты кысаларында менталь тайпылышлы балалар белән эшләү буенча белем алды.

Моннан тыш, шәһәрнең 16 мәктәбеннән 21 педагог, психофизик үзенчәлекләрне исәпкә алып, төрле нозологиядәге балалар белән һөнәри эшләүгә өйрәтелгән.

Күптән түгел Казанның барлык районнарында да вакансияләр ярминкәләре узачаклыгы хәбәр ителде. Чараларда шәһәр халкы вакантлы вазыйфалар турында беләчәк һәм Халыкны эш белән тәэмин итү хезмәте белгечләре белән киңәшләшә алачак.