«Әни турында сүз көче»: инклюзив бәйгедә 124 үзенчәлекле бала катнашачак

Ярымфинал 29 ноябрьдә «Бергә» үзәгендә узачак

Марат Мөгыйнов фотосы

«Игелекле Казан» автоном коммерцияле булмаган оешмасы тарафыннан инвалид һәм сәламәтлеге чикле балаларга оештырыла торган сөйләм осталыгы һәм нәфис сүз бәйгесендә катнашу өчен 124 гариза кабул итеп алынган. Балалар үзләренең иҗади сәләтләрен бу шимбәдә көндезге турда тәкъдим итәчәкләр.

Халыкара Әниләр көне уңаеннан иҗат ярышының онлайн этабы инде уздырылган. Балалар бәйгегә үзләренең видеоларын юллаган. Аларда әниләр турында шигырьләр яңгырый, шул исәптән иншалар да язылган.

Хәзерге вакытта ярымфиналда катнашучыларны сайлыйлар. Бәйгенең көндезге этабы 29 ноябрьдә инклюзив «Бергә» өстәмә белем бирү үзәгендә узачак.

Бу көнне катнашучыларның һәр төркеме өчен тирәлеккә җайлашу күнекмәләре һәм иҗади остаханәләр, шул исәптән артикуляция гимнастикасы үткәреләчәк.

Сөйләм осталыгы буенча рус һәм татар телләрендә остаханәләр оештырылачак. Аларны бәйгенең сәнгать җитәкчесе, Татарстан Республикасының атказанган артисты, телевидение дикторы, логопед һәм «Тылсым» үзәге укытучысы Зөлфия Курамшина, шулай ук Татарстан Республикасының атказанган артисты, Казан театр училищесы укытучысы һәм диктор Инсаф Абдулла үткәрәчәк.

Бәйгенең финалы декабрьдә уздырыла, анда катнашучыларга дипломнар һәм грамоталар тапшырылачак. Җиңүчеләр истәлекле бүләкләр алачак.

Балаларның чыгышларына бәйгенең жюри әгъзалары бәя бирәчәк. Жюри составына Татарстан Республикасының халык артисты, Казан яшь тамашачы театры актрисасы Нина Калаганова, «Игелекле Казан» автоном коммерцияле булмаган оешмасы директоры урынбасары һәм «Тылсым» үзәге җитәкчесе Лиана Садыйкова кертелгән.

Алдарак бу елны Татарстан башкаласының беренче тапкыр Россия күләмендә үткәрелә торган «Юмарт сишәмбе» акциясенә кушылуы турында хәбәр ителгән иде. Хәйрия чарасы 2 декабрьгә кадәр дәвам итә. Акцияне «Игелекле Казан» автоном коммерцияле булмаган оешмасы үткәрә.

Шулай ук укыгыз

Барлык яңалыклар