Ел башыннан ТР эшкуарларына һәм үзмәшгульләренә кече һәм урта эшмәкәрлеккә ярдәм итү илкүләм проекты буенча 11 меңнән артык хезмәт күрсәтелгән

Ярдәм чаралары арасында – бизнес-план эшләүне финанслау, предприятиеләрнең бизнес-аудиты, маркетплейс һәм социаль челтәрләрдә эшләргә ярдәм итү.

Фото: Марат Мөгыйнов

(Казан шәһәре KZN.RU, 18 нче август). Ел башыннан «Минем бизнес» Татарстан үзәге үз бизнесларын башларга ниятләгән эшмәкәрләргә, үзмәшгульләргә һәм республика халкына 11 меңнән артык хезмәт күрсәткән. Алар финанс чараларын ала, бушлай хезмәт күрсәтүдән файдалана һәм эшмәкәрлек эшчәнлеге алып бару белән бәйле мәсьәләләр буенча консультация сорый алалар.

Татарстанда эшмәкәрләргә һәм үзмәшгульләргә маркетплейсларга чыгу, электрон мәйданчыкларда үз эшләрен үстерү һәм Россия социаль челтәрләрендәге реклама кабинетларында эшләү буенча махсус программалар бар. Аларга шулай ук күргәзмәләрдә катнашу, бизнес-план эшләүне финанслау, предприятиеләрнең бизнес-аудиты, Россия социаль челтәрендә реклама бюджетын икеләтә арттыру һәм башка ярдәм тәкъдим ителә.

Республика районнарында Эшмәкәрлеккә ярдәм итү фондының төбәк вәкилләре эшли. Элемтә өчен мәгълүмат сайтта «Минем бизнес» бүлегендә урнаштырылган. Ярдәмнең уңайлы чаралары турында актуаль мәгълүмат шулай ук мойбизнес.рф порталында һәм ТР Икътисад министрлыгына караган ТР Эшмәкәрлеккә ярдәм итү фонды сайтында урнаштырылган.

«Минем бизнес» үзәгенең барлык хезмәтләре турында +7(843)524-90-90 кайнар линия телефоны аша белергә мөмкин. Консультацияләр күп функцияле үзәктә түбәндәге адрес буенча үткәрелә: Петербург ур., 28.

«Минем бизнес» үзәге Россия Икътисадый үсеш министрлыгы һәм ТР Икътисад министрлыгы ярдәме белән «Кече һәм урта эшмәкәрлек һәм шәхси эшмәкәрлек инициативасына ярдәм» илкүләм проектын гамәлгә ашыру кысаларында эшчәнлек алып бара.

Бүген үз бизнесын ачарга теләүчеләргә һәм үз проектларын гамәлгә ашыручыларга 84 төбәк һәм 300 дән артык «Минем бизнес» муниципаль үзәкләре ярдәм итә. Август аенда Тулада дәүләт ярдәме сорап үзәккә өч миллионлы визит теркәлгән, дип хәбәр итә ТР Икътисад министрлыгының матбугат хезмәте.

Шулай ук укыгыз

Барлык яңалыклар