«Кремль + һәр кеше»: Казан Кирмәнендә инклюзив чаралар көтелә

Инвалидлар ункөнлегендә агарту чаралары һәм адаптив экскурсияләр оештырыла

Денис Гордийко фотосы

Инвалидлар ункөнлеге уңаеннан, 1-10 декабрь көннәрендә, Казан Кремле инклюзив чаралар әзерли. Инвалидлар өчен экскурсияләр, остаханәләр һәм агарту чаралары үткәреләчәк.

Әйтик, 1 декабрьдә сукыр эксперт-музыкант «Палитра-тавыш» остаханәсен уздырачак. Очрашуда катнашучылар музыкаль композициянең ничек барлыкка килүен беләчәк һәм аны булдыруда катнаша алачак. Теләге булган һәр кешене 18:30 сәгатьтә Гавами урыннар бинасындагы лекторийда көтәләр. Чарада катнашу өчен сылтама буенча теркәлергә кирәк.

Рус ишарәләр теле дәресен 4 декабрьдә оештыралар. Анда катнашучылар сәфәрләр һәм сәяхәтләр турында төп ишарәләр, фразалар белән танышачак. Мастер-классны рус ишарәләр теле тәрҗемәчесе Екатерина Ибәтуллина үткәрә. Катнашу өчен сылтама буенча теркәлергә кирәк, дәрес 18:30 сәгатьтә башлана. Казанлыларны Гавами урыннар бинасында көтәләр.

Сукыр һәм начар күрүче кунаклар өчен 3 декабрьдә Благовещение соборының тарих музеенда тифлокомментарийлар һәм тактиль модельләр белән экскурсия, шулай ук витраж сәнгате буенча «Благовещение соборы төсләрдә: тарихтан витраж сәнгатенә кадәр» (16+) остаханәсе үткәреләчәк. Алдан теркәлү өчен телефон номеры: +7 (843)567-81-22. Экскурсия 15:00 сәгатьтә башлана.

10 декабрьдә «Эрмитаж Казан» үзәге кунакларны һәм шәһәр халкын Россия Эрмитажы җыелмасыннан «Йосыповлар. Гасырлар аша килеп җиткән зиннәтлелек» күргәзмәсенә чакыра. Чарада шулай ук тифлокомментарийлар һәм тактиль модельләр кулланылачак. Теләге булган һәр кунакны 14:00 сәгатьтә көтәләр, чарага теркәлү өчен телефон номеры: +7 (843)567-81-22.

Чаралар шулай ук ишетү сәләте бозылган затлар өчен дә әзерләнә. Әйтик, 7 декабрьдә Казан яшьләре өчен рус ишарәләр телендә «Очрашырбыз... кайда? Яшүсмерләр сайлавы» тикшеренү дәресе оештырыла. Әлеге сылтама буенча теркәлү сорала, чара 13:00 сәгатьтә башлана.

Балалар өчен Татарстан табигать тарихы музеенда рус ишарәләр телендә «Хыяллар музее» дигән иҗади дәресе булган экскурсия үткәреләчәк. Яшь шәһәрлеләрне 10 декабрьдә 16:00 сәгатьтә көтәләр, сылтама буенча теркәлү мөһим.

Менталь тайпылышлары булган кунаклар өчен 9 декабрьдә шулай ук Татарстан табигать тарихы музеенда «Хыяллар музее» дигән иҗади дәресе булган экскурсия уздырылачак. Чара 10:00 сәгатьтә башлана, катнашу өчен сылтама буенча теркәлергә кирәк.

Инвалидлар ункөнлегендә I, II, III төркем инвалидлар Казан Кремленең барлык музейларына һәм күргәзмә залларына бушлай (инвалидлыкны раслый торган документ күрсәтелгәндә) керә ала, дип хәбәр итә музей-тыюлыкның матбугат хезмәте.

Шулай ук укыгыз

Барлык яңалыклар