Балалар хоккей лигасы Казанның яшүсмерләр клубларына хоккей киемнәрен тапшырды

«Татнефть» ярдәме белән сатып алынган 66 комплектны «Яшүсмер» берләшмәсе кабул итеп алган

Денис Гордийко фотосы

Казанның яшүсмерләр хоккей клубларында шөгыльләнүчеләргә һәм тренерларга 66 комплект заманча хоккей экипировкасы бүләк ителгән. Спортта югары нәтиҗәләр күрсәтүләре һәм әһәмиятле ярышларда актив катнашулары өчен спорт кирәк-яракларын «Алтын алка» балалар хоккей лигасы башкарма директоры Константин Маргольф һәм «Татнефть» гавами акционерлык җәмгыяте генераль директоры, Татарстан Республикасының Хоккей федерациясе һәм «Ак Барс» хоккей клубы президенты Наил Маганов тапшырган. Экипировкага сертификатлар «Ак Барс»-2011 хоккей командасын хөрмәтләү тантанасы вакытында «Яшүсмер» муниципаль бюджет учреждениесе директоры Екатерина Согринага һәм яшьләр белән эшләү буенча белгеч Язгар Зәкиевка бирелгән.

Шәкертләр һәм аларның остазлары бозга чыгу өчен сыйфатлы спорт киемнәре: шлемнар, тимераяклар, күкрәкчәләр, терсәкчәләр, калканнар, кәшәкәләр һ.б. алган. Яңа форма даими күнегүләр өчен дә, шәһәр һәм республика ярышларында ышанычлы чыгыш ясау өчен дә каралган.

«Бөтенроссия «Алтын алка» турнирында катнашу өчен Татарстан тарафыннан игълан ителә торган командалар саны буенча статистиканың биш ел дәвамында артуы күзәтелә. Бу елны бездә инде 139 команда билгеле һәм мин гаризалар бирү кампаниясе ахырына аларның саны 150 гә якын булыр дип өметләнәм. Бу яхшы шартлар булдырылуын һәм Казанда яңа хоккей мәйданчыклары барлыкка киләчәген ачык күрсәтә торган мисал. Мин Казан егетләренең берәрсе май аенда Түбән Новгородта узачак финалга чыга алыр дип өметләнәм. Мэрның хоккей уйнавы үзе бик әһәмиятле күренеш. Димәк, ул балаларга нинди ярдәм кирәклеген шәхсән аңлый. Мондый җитәкчеләр, 5-6 яшьтән алып 18 яшькә кадәрге балаларны тәрбияләп, Россиянең киләчәген формалаштыра», - диде ул.

«Хәзерге вакытта клублар белән беррәттән, яшүсмерләр командаларына да яңа хоккей экипировкасын тапшыру кебек ярдәм күрсәтелүенә без чиксез шатбыз. Бу күп кенә балаларга ишегалдында хоккей белән шөгыльләнә башларга мөмкинлек бирәчәк. Һәм, әлбәттә, хоккейны уңайлы итү, теләсә кайсы малайның үз ишегалдына чыгып, рәхәтләнеп хоккей уйный алу мөмкинлеген арттыру безнең дә төп бурыч, - дип сөйләде «Яшүсмер» муниципаль бюджет учреждениесе директоры Екатерина Согрина. – Без ишегалды хоккей командаларын даими үстерәбез: «Алтын алка»дан тыш, ишегалды командаларының эчке турнирлары да бар, без сезон саен аларны ничек яхшырак итү һәм тагын да күбрәк балаларны колачлау турында фикер алышабыз. Без ишегалды хоккее буенча да дөнья хоккее йолдызлары туа ала дип ышанабыз».

Исегезгә төшерәбез, Казанның яшүсмерләр клубларында 12 тренер җитәкчелегендә 660 яшүсмер шөгыльләнә. Күнекмәләр шәһәрнең 83 ачык хоккей мәйданчыгында һәм алты боз аренасында уза. Профессиональ хоккей белән биш муниципаль спорт мәктәбендә: «Динамо», «Волна», «Стрела», «Ак Бүре» һәм «Авиатор»да шөгыльләнергә була.

Шулай ук укыгыз

Барлык яңалыклар