Дарья Санникова БРИКС+ илләре шәһәрләре ассоциациясендә эшләү буенча мэр киңәшчесе итеп билгеләнде

Ул 2016 елдан Туризмны үстерү комитетын җитәкләгән, бу вакыт эчендә Казанга килүче туристлар саны 4,5 миллион кешегә җиткән

Туризмны үстерү комитеты фотосы

Туризмны үстерү комитеты директоры Дарья Санникова БРИКС илләре шәһәрләре ассоциациясендә эшләү буенча мэр киңәшчесе итеп билгеләнде. Хәзерге вакытта Казан мэры Илсур Метшин Ассоциациянең мактаулы рәисе булып тора.

«Казанда оештырылган БРИКС+ илләре шәһәрләре ассоциациясен 20 илдән 18 меңнән артык мэр хуплады. Әлеге юнәлештә беренче чаралар узды: БРИКС+ илләре китапханәсе булдырылды, Халыкара яшүсмерләр фестивале оештырылды. Ассоциация актив эшли башлый һәм бу юнәлешне көчәйтергә кирәк. Дарья Александровна, Казанның туристлык потенциалын актив рәвештә алга әйдәп, күпсанлы халыкара институтлар белән киң элемтәләр булдырды. Бу тәҗрибә Ассоциация кысаларындагы багланышлар өчен бик кирәк», - дип фикерләре белән уртаклашты Илсур Метшин.

БРИКС+ илләре шәһәрләре ассоциациясе Казан мэры Илсур Метшин тәкъдиме белән төзелде. Оештыру җыелышы 2024 елның июнендә Казан Ратушасында узды. Аңа егермегә якын илдән – Кытай, Һиндстан, Бразилия, Көньяк Африка Республикасы, Россия, Чили, Индонезия, Берләшкән Гарәп Әмирлекләре, Белоруссия дәүләтләреннән 200 дән артык мэр, вице-мэр һәм муниципаль берәмлек ассоциациясе лидерлары килгән иде. Әлеге илләрдә барлыгы 2,6 миллиард кеше яши дип исәпләнә. Йомгаклап әйткәндә, башкалада оештырылган Ассоциация 18 меңнән артык шәһәр һәм муниципаль берәмлекне берләштерә.

Ассоциация оешкан вакытта аның рәисе итеп Илсур Метшин сайланды. Бу елның маенда Бразилиядә берләшмәне Бразилиянең Марика шәһәре мэры Вашингтон Куакуа җитәкләде. Илсур Метшин мактаулы рәис итеп сайланды.

Ассоциация кысаларында төрле юнәлешләр буенча берничә комитет эше уздырылган. Әйтик, Иранда урбанистика һәм шәһәр төзелеше буенча эшлекле очрашулар үткән, анда БРИКС+ илләре шәһәрләрендә иң яхшы проектларны билгеләп үтү өчен шәһәр төзелеше буенча премия булдыру турында фикер алышканнар.

Казанда БРИКС+ илләре китапханәсе ачылды, анда һәр ил вәкиле үзләренең иң яхшы авторларының матур әдәбият үрнәкләрен бүләк итеп калдырган.

Халыкара яшүсмерләр фестивале беренче зур халыкара вакыйганың ачык мисалы булып тора. Ул сентябрь аенда Казанда узды һәм яшьләр өчен БРИКС+ форматындагы иң зур чараларның берсенә әйләнде. Анда Кытай, Бразилия, Һиндстан һәм Россияне дә кертеп, 13 илдән 150 дән артык яшүсмер катнашты. Мондый фестивальләрне даими үткәрү турында карар кабул ителде.

Дарья Санникова 2016 елдан Казанның Туризмны үстерү комитетын җитәкли. 2014 елда ул комитетта белгеч, аннары җитәкче урынбасары булып эшли. 2014 елда башкалада туристлар агымы 1,7 миллион дип исәпләнсә, 2024 ел нәтиҗәләре буенча әлеге күрсәткеч 4,5 миллионга җиткән.

Дарья Санникова Казанда футбол буенча FIFA 2018 дөнья чемпионатын әзерләүгә һәм уздыруга керткән өлеше өчен Татарстан рәисе рәхмәте, «Татарстан Республикасында җирле үзидарәне үстерүдәге казанышлары өчен» медале, Казан шәһәренең туризм өлкәсен үстерүгә керткән өлеше һәм намуслы хезмәте өчен Казан мэры рәхмәте, 2024 елда Казанда БРИКС илләренең XVI Саммитын әзерләүгә һәм уздыруга керткән өлеше өчен Казан мэрының истәлекле медале белән бүләкләнгән.

Шулай ук укыгыз

Барлык яңалыклар