«Зәкят» хәйрия фонды ярты ел эчендә 500 мохтаҗга азык-төлек җыелмалары тапшырган

Җыелмалар составына он, ярмалар, көнбагыш мае, консервалар, тәм-томнар, шикәр, макарон һәм чәй керә.

Фото: ТР мөселманнары Диния нәзарәте матбугат хезмәте

(Казан шәһәре KZN.RU, 23-нче март). ТР мөселманнары Диния нәзарәтенең «Зәкят» хәйрия фонды халыкка азык-төлек ярдәме күрсәтүне дәвам итә. 2020 елның сентябреннән бүгенге көнгә кадәр 500 мохтаҗга – 65 яшьтән өлкәнрәк кешеләргә һәм Татарстанның 25 районындагы күп балалы гаиләләргә азык-төлек җыелмалары җибәрелде.

Җыелмалар составына он, ярмалар, көнбагыш мае, консервалар, тәм-томнар, шикәр, макарон һәм чәй керә. Районнарда өлкән һәм күп балалы гаиләләргә азык-төлек пакетларын имам-мөхтәсибләр китерә.

Коронавирус пандемиясе чорында азык-төлек җыелмаларын тарату «Татарстан Республикасында социаль ярдәм үзәге» проекты кысаларында Президент грантлары фонды ярдәмендә гамәлгә ашырыла. Проект 48 мөхтәсибәтне колачлар дип көтелә, алар Татарстанның барлык районнарында мохтаҗларга 1000-нән артык җыелма тапшырачак, дип хәбәр итә ТР Диния нәзарәтенең матбугат хезмәте.

Шулай ук укыгыз

Барлык яңалыклар