Казан халкы шәһәр бюджеты буенча ачык тыңлауларда катнаша ала

Гаризалар бирү вакыты – 31 нче октябрьгә кадәр

Фото: Денис Гордийко

(Казан шәһәре KZN.RU, 19 нчы октябрь). Казан Башкарма комитетында 2024 елга, 2025 һәм 2026 елларның план чорына шәһәр бюджеты турында фикер алышу өчен ачык тыңлаулар узачак. ТР башкаласы Мэрының тиешле карары Документлар җыентыгының 2023 елның 19 нчы октябреннән чыккан махсус чыгарылышында басылып чыкты.

Тыңлауларда Казан халкы катнаша ала. Аларда чыгыш ясау хокукы белән гаризалар, шулай ук фикер алышу мәсьәләсе буенча тәкъдимнәр һәм искәрмәләр эш көннәрендә 9:00 сәгатьтән 12:00 сәгатькә кадәр һәм 13:00 сәгатьтән 18:00 сәгатькә кадәр Кремль урамы, 3 йорт, 313 кабинет адресы буенча кабул ителә. Гаризалар бирү вакыты – 31 нче октябрьгә кадәр. Өстәмә мәгълүматны +7(843)299-14-19 телефоны буенча алырга мөмкин.

Ачык тыңлаулар 7 нче ноябрьдә 15:00 сәгатьтә Кремль урамы, 3 адресы буенча Казан Башкарма комитетының зур утырышлар залында узачак.

Депутатлар карары проекты нигезендә, 2024 елга шәһәр бюджетының гомуми керемнәре күләме – 41 млрд 530 млн 932 мең сум, чыгымнары шул ук күләмдә фаразлана.

2025 елга керемнәрнең гомуми күләме – 40 млрд 764 млн 983 мең 200 сум, чыгымнар шул ук күләмдә фаразлана.

2026 елга керемнәрнең гомуми күләме – 41 млрд 119 млн 29 мең 100 сум, чыгымнар шул ук күләмдә фаразлана.

Шулай ук укыгыз

Барлык яңалыклар