Татарстан Республикасы башкаласында иң яхшы архитектура үрнәген сайлаячаклар

Бәйгегә гаризалар 10 ноябрьгә кадәр кабул ителә

Казанның Үсеш институты Татарстан башкаласының иң яхшы архитектура һәм шәһәр төзелеше проектларына багышланган ел саен үткәрелә торган смотр-конкурска гаризалар кабул ителә башлавы турындагы хәбәрне җиткерә. Бу елгы номинацияләр исемлеге «Иң яхшы социаль объект интерьеры дизайны» дигән мөһим категория белән тулыланган.

Эшләр өч категориядә түбәндәге 13 номинация буенча бәяләнәчәк: «Территорияләрне үстерү буенча иң яхшы концепция», «Иң яхшы коммерцияле күчемсез милек объекты», «Иң яхшы торак комплексы», «Иң яхшы социаль объект», «Иң яхшы социаль объект интерьеры дизайны», «Территорияләрне иң яхшы төзекләндерү», «Тотрыклы үсеш өлкәсендә иң яхшы проект», «Иң яхшы реновация объекты», «Иң яхшы инженерлык-техник объект», «Иң яхшы архитектура-сәнгать яктыртуы», «Иң яхшы арт-объект», «Иң яхшы шәхси торак йорт», «Шәһәрлеләр сайлавы» (онлайн-тавыш бирү). Матур гадәт буенча, шәһәр халкы бәя бирүдә катнаша ала, дип хәбәр итә Казанның үсеш институты.

Конкурс дүрт этапта уздырыла. 10 ноябрьгә кадәр гаризалар кабул ителә. Ачык онлайн тавыш бирү вакыты – 4-20 ноябрь көннәрендә, жюри утырышы 21-25 ноябрьгә билгеләнгән. Җиңүчеләрне ел саен декабрьдә уздырыла торган «Диалоглар» архитектура-шәһәр төзелеше конференциясендә игълан итәчәкләр.

Гаризаны әлеге онлайн-форманы тутырып тапшырырга кирәк. Шартлар белән сайтта урнаштырылган нигезләмәдә танышырга була.

Катнашу өчен объектның адресын, исемен, проектны гамәлгә ашыру аен һәм елын, шулай ук авторның исем-фамилиясен, атасының исемен яки авторлык коллективының исемен күрсәтергә кирәк. Моннан тыш, бәйгедә катнашучыларның проект экспозициясен PDF форматта (20 МБ дан артык түгел) бер файлга туплап җибәрүләре сорала.

Шулай ук укыгыз

Барлык яңалыклар