Р.Миңнеханов 2018 елгы дөнья чемпионатына әзерлек турында: “Бөтен өлкәләрдә дә иминлек тәэмин итәргә кирәк”

ТР Президенты “Казан Аренада” республика Куркынычсызлык советының киңәйтелгән утырышын уздырды.

(Казан шәһәре KZN.RU, 3-нче май). FIFA футбол буенча дөнья чемпионатын уздыру вакытында казанда куркынычсызлык сораулары буенча Татарстан Республикасы Куркынычсызлык Советының уртак киңәйтелгән утырышы үтте. Утырышны ТР Президент Рөстәм Миңнеханов уздырды. “Казан Арена” стадионында үткән чарада Татарстан Республикасы Премьер-министры Алексей Песошин, ТР Дәүләт Советы рәисе Фәрит Мөхәммәтшин, Татарстанның Дәүләт Киңәшчесе Минтимер Шәймиев, ТР Куркынычсызлык советы секретаре Айрат Шәфигуллин, Башкарма комитет җитәкчесе Денис Калинкин һ.б. катнашты.

ТР Президенты ассызыклаганча, куркынычсызлыкны бөтен өлкәләрдә дә гарантияләргә кирәк: аерым һәр катнашучыдан алып, бөтен җәлеп ителә торган ресурслар һәм инфраструктура объектларына кадәр. “Дөнья чемпионатына кадәр бер ай тирәсе калды. Без әзерләнү эшендә финишка килеп җитәбез. Иң мөһим бурыч – турнирны югары дәрәҗәдә үткәрү. Без катнашучылар, кунаклар, шәһәр һәм республикабыз халкы иминлеген тәэмин итәргә тиеш", - диде Р.Миңнеханов.

Ул өстәгәнчә, бүген Казанда объектларны террордан саклау, янгын куркынычсызлыгы һәм су объектларында куркынычсызлык, юл хәрәкәте иминлеге, энергия белән тотрыклы тәэмин итү, сәнәгый предприятиеләрнең ышанычлы эшләп торуы, эпидемиологик имнлекне булдыру өстендә күп эш башкарыла.

“Бурычыбыз – җитешсезлекләрне ачыклау һәм аларны юк итү юлларын табу”, - дип тәмамлады Рөстәм Миңнеханов.

Шулай ук укыгыз

Барлык яңалыклар