Казанның иң яхшы объекты конкурсында катнашу өчен гаризалар кабул итү дәвам итә

Быел конкурсантлар тормышка ашырылмаган проектларны тәкъдим итә алалар.

Фото: Денис Гордийко

(Казан шәһәре KZN.RU, 14 нче сентябрь). 31 нче октябрьгә кадәр Казанда иң яхшы архитектура һәм шәһәр төзелеше проекты смотр-конкурсында катнашу өчен гаризалар кабул итү дәвам итә. Ярышларга йомгак чираттагы «Казаныш» архитектура форумында ясалачак.

Смотр-конкурста проект авторлары яки хокук ияләре катнаша ала. Бәяләүнең төп критерийлары – Казанның милли колориты үзенчәлеге һәм чагылышы, төгәллек һәм тәэсирлелек, стиль чишелеше, тормышка ашыруның комплекслылыгы, шулай ук формаларның эргономиклыгы, функциональлеге һәм нәтиҗәлелеге.

Конкурс 12 номинациядә үткәрелә: «Иң яхшы коммерцияле күчемсез милек объекты», «Иң яхшы гомуми файдаланудагы урын», «Иң яхшы арт-объект», «Иң яхшы инженерлык корылмасы», «Иң яхшы паркинг», «Иң яхшы реновация объекты», «Иң яхшы шәһәр төзелеше концепциясе», «Шәһәрлеләр сайлавы», «Ел дебюты» һәм «Иң яхшы архитектура-сәнгать яктыртуы». Катнашучылар берьюлы берничә номинациядә катнашу өчен гариза бирә ала.

Идеяләр өч категориядә тәкъдим ителергә мөмкин – тормышка ашырылган һәм тормышка ашырылмаган проектлар, Архитектура һәм шәһәр төзелеше идарәсе белән килешенгән, шулай ук тормышка ашырылмаган һәм килештерелмәгән проектлар. Соңгы категория быел өстәлде.

Җиңүчеләрне билгеләү ике этапта узачак: башта ачык онлайн-тавыш бирү булачак, аннары – жюри әгъзаларының тавыш бирүе, дип хәбәр иттеләр Шәһәрне үстерү институтында.

Смотр-конкурста катнашу өчен сылтама буенча гариза тутырырга кирәк. Конкурс турында тулырак мәгълүматны нигезләмәне укып белергә була.

Исегезгә төшерәбез, чираттагы «Казаныш» архитектура форумы ТР башкаласында 1-3 нче декабрьдә узачак. Быел ул «Яшьләр шәһәре» темасына багышланган.