«Музыка барлык чорларга»: Казан мәктәп укучылары проектта катнаша ала

Бөтенроссия акциясе 25 марттан 15 апрельгә кадәр узачак

25 марттан 15 апрельгә кадәр рус композиторы Петр Ильич Чайковскийның тууына 185 ел тулуга багышланган «Музыка барлык чорларга» бөтенроссия акциясе узачак. Иҗади ярышларда катнашучылар булырга бөтен илдән мәктәп укучыларын чакыралар – аларга музыкаль, хореографик һәм сәнгать юнәлешләрендә үз талантларын күрсәтергә туры киләчәк.

Балаларга тәкъдим ителгән бер яки берничә номинациядә эш әзерләргә кирәк: «Инструменталь иҗат», «Вокал», «Хореография», «Рәсем иҗаты». Катнашуга гаризаны РФ Мәктәп укучылары өчен мәдәният порталында шәхси кабинетта калдырырга кирәк.

Россиянең танылган мәдәният һәм сәнгать эшлеклеләре арасыннан эксперт комиссиясе 100 иң кызыклы эшне сайлаячак. Җиңүчеләрнең хезмәтләрен проект порталында бастырачаклар, дип хәбәр иттеләр ТР Мәдәният министрлыгында.

Петр Ильич Чайковскийның иҗаты – дөньякүләм музыка культурасының башы. Аның әсәрләре – «Щелкунчик», «Аккош күле» һәм «Йокыга талган гүзәл» – классик сәнгать символлары булды. Симфонияләрне һәм операларны бөтен дөньяда беләләр һәм яраталар. Композитор әсәрләре белән балаларның танышуы белем дәрәҗәсен киңәйтә, аларның рухи дөньясын баета һәм илнең мәдәни мирасына ихтирам уята.

Акция «Мәктәп укучылары өчен мәдәният» идарәара проекты кысаларында уздырыла. Ул РФ Мәдәният министрлыгы һәм РФ Мәгариф министрлыгы тарафыннан Мәдәният стратегияләре һәм проект идарәсе үзәге һәм Россия мәдәният фонды белән берлектә гамәлгә ашырыла.

Шулай ук укыгыз

Барлык яңалыклар