Казанның полиция хезмәткәрләре «кайнар эзләр» буенча телефон мошенниклары курьерын тоткарлаган

Казанның 90 яшьлек кешесенә полиция хезмәткәрләре көче белән урланган 250 мең сум акчасы кире кайтарылган

Марат Мөгыйнов фотосы

Казанда полиция хезмәткәрләре «кайнар эзләр» буенча мошенниклык очрагын ачкан һәм 90 яшьлек пенсионерга телефон аферистлары тарафыннан урлаган 250 мең сум акчасын кире кайтарган. Россия Эчке эшләр министрлыгының Казан буенча идарәсе матбугат хезмәтендә хәбәр итүләренчә, мәгълүмати-телекоммуникация технологияләрен кулланып җинаятьләрне ачу бүлекчәсе хезмәткәрләре «Зареченский» бүлегендәге полиция хезмәткәрләре белән бергә мошенниклар курьерын тоткарлаган. Ул шәһәрнең 18 яшьлек кешесе булып чыккан.

Шунысы мәгълүм, өлкән яшьтәге ир затына үзен дәүләт ведомствосы хезмәткәре дип таныштырган билгесез кеше шалтыраткан. Ул пенсионер исеменнән, янәсе, хокукый яктан дөрес булмаган эшчәнлек алып барыла, дип хәбәр иткән һәм аны җыелган акчаларын «куркынычсыз шартларда сакларга» күндергән. Киров районында урнашкан йорт ишегалдында зыян күрүче курьерга 250 мең сум акча салынган пакет тапшырган.

Берникадәр вакыттан соң ир-ат үзенең алдакчылар корбаны булуын аңлый һәм полициягә мөрәҗәгать итә. Урланган акчалар кире алына һәм хуҗасына тулы күләмдә кайтарыла.

Хәзерге вакытта кылынган җинаятьнең башка катнашучыларын һәм мөмкин булган өстәмә эпизодларны ачыклауга юнәлдерелгән оператив-эзләү һәм тикшерү чаралары дәвам итә. Тоткарланучыга карата чик кую чарасы сыйфатында аңа читкә китмәү һәм тиешле тәртибе турында хәбәр итеп тору гамәле сайланган. Тикшерү дәвам итә.

Исегезгә төшерәбез, «Минем Казан/Моя Казань» порталында киберкуркынычсызлык буенча махсус бүлек эшли башлады. Әлеге яңа чыганак интернет-җинаятьләр дулкынын туктатырга тиеш. Бүлектә аккаунтларны ничек сакларга кирәген аңлаткан күрсәтмәләр, гаджетларны куллану буенча файдалы киңәшләр һәм кирәкле элемтә чыганаклары белән танышырга була. Элемтәгә керү чыганакларына аерым игътибар бирелгән: төп биттә полиция хезмәткәрләре белән элемтәгә керү өчен кайнар линия хезмәтенең телефон номерлары, шулай ук оператив консультацияләр өчен Казан мэриясендәге шалтырату үзәгенең телефон номеры урнаштырылган.

Шулай ук укыгыз

Барлык яңалыклар