Шәһәр Думасы депутатлары 2023 елга ТР башкаласы бюджетына үзгәрешләр кертте

Казан бюджеты күләме керемнәр буенча – 40 млрд 487,9 млн сум, чыгымнар буенча 46 млрд 78,1 млн сум тәшкил итәчәк

Фото: Марат Мөгыйнов

(Казан шәһәре KZN.RU, 14 нче ноябрь, Диләрә Гафурова). 2023 елга Казан бюджетына үзгәрешләр кертелде. Аның керем өлеше – 40 млрд 487,9 млн сум, чыгым өлеше 46 млрд 78,1 млн сум тәшкил итәчәк. Мондый карарны Казан шәһәр Думасы депутатлары XXVI сессиядә кабул итте. Утырышны ТР башкаласы Мэры Илсур Метшин үткәрде.

Шәһәр бюджетына үзгәрешләр кертү кирәклеге берничә сәбәп белән бәйле, дип аңлатты Казан Башкарма комитетының Финанс идарәсе башлыгы Ирек Мөхәммәтшин. ТР Хөкүмәтенең норматив актларына туры китереп бүлеп бирелгән өстәмә финанс ярдәме ярдәмендә быел шәһәр бюджетына түләүсез керемнәр күләме 1 млрд 907,2 млн сумга артты. Акчалар төзекләндерү объектларын һәм урам-юл челтәрен тотуга – 1 млрд 493,6 млн сум, юллар төзегәндә һәм реконструкцияләгәндә җир кишәрлекләрен тартып алуга – 239,8 млн сум, шәһәр транспортын арендалау килешүләре буенча лизинг түләүләрен түләүгә – 95 млн сум, муниципаль учреждениеләрне карап тотуга – 33,2 млн сум, оешмаларның мөлкәтенә салым түләүгә – 11,2 млн сум, балаларның каникулларда ялын оештыруга – 6,5 млн сум һ.б. өчен юнәлдереләчәк.

ТР бюджетыннан чыгымнарны һәм шәһәр бюджеты акчаларының калдыкларын торгызу хисабына ел башына аның чыгым өлеше артачак. Акчалар муниципаль учреждениеләрне тотуга – 450,1 млн сум, территорияләрне төзекләндерүгә һәм урам-юл челтәрен тотуга – 334,8 млн сум, юллар төзегәндә җир кишәрлекләрен тартып алуга – 76 млн сум, гомумшәһәр чараларын үткәрүгә – 34,8 млн сум һ.б. өчен юнәлдереләчәк.

Моннан тыш, автономияле һәм бюджет учреждениеләренең кулланылмаган калдыкларын кайтару хисабына социаль өлкә учреждениеләрен карап тотуга шәһәрнең чыгымнары 18 млн сумга арта.

Кертелгән үзгәрешләр нәтиҗәсендә 2023 елга Казан бюджеты күләме керемнәр буенча 40 млрд 487,9 млн сум тәшкил итәчәк, чыгымнар буенча – 5 млрд 590,2 млн сум дефицит белән 46 млрд 78,1 млн сум, аны каплау чыганагы ел башындагы шәһәр бюджеты акчалары калдыклары булачак, дип нәтиҗә ясады Ирек Мөхәммәтшин.