Казан мэриясе делегациясе «Россия шәһәрләре: үсеш локомотивлары» форумында катнаша

Башкарма комитеты хезмәткәрләре ТР башкаласында гамәлгә ашырыла торган туристлык һәм финанс проектлары турында сөйләделәр

Казан мэриясе делегациясе «Россия шәһәрләре: үсеш локомотивлары» VIII Гомумроссия Стратегик үсеш форумында катнаша. Чара 14—15 ноябрьдә Екатеринбургта уза, программа 75 эшлекле чараны үз эченә ала.
Шәһәр Башкарма комитетының финанс идарәсе башлыгы Ирек Мөхәммәтшин бүгенге көндә 594 учреждениедә яңа роботлар тоташтырылган һәм эшли, алар сәгатькә 21 мең кеше эшен сакларга мөмкинлек бирә, дип сөйләде.

Гамәлгә кертелгән роботлар контрактларны теркәү һәм түләү турында 50 мең килешү, түләнгән документларны эшкәртүдән 200 мең өземтә, җитәкчеләргә хисапларны түләү турында 3 мең хәбәрнамә, хезмәткәрләрдән кайнар линиягә 2 мең мөрәҗәгать төзегән. Накладнойларны кертү, хисапларны танып белү, банкның керем өлешен тарату һәм финанслауга гаризалар җыю буенча роботлар сәгатькә 33 мең кеше эшен сакларга мөмкинлек бирәчәк.

Түбән Новгород финанслар департаменты директоры Юрий Мочалкин белән бергә Ирек Мөхәммәтшин «Муниципаль бюджетлар: шәһәр үсешенең яңа мөмкинлекләре һәм бурычлары» секциясендә чыгыш ясады. Алар үзәкләштерелгән бухгалтерлык хисабы системасын цифрлы үзгәрү тәҗрибәсе белән уртаклаштылар. Шәһәрләрдә куелган бурычларны тормышка ашыруга төрле алымнар кулланылуга карамастан, аларның принцибы якынча бертөрле.

Шәһәр Башкарма комитетының финанс идарәсе башлыгы «Туристлык индустриясен үстерүдә яңа мөмкинлекләр: муниципалитетларның роле» панель дискуссиясендә доклад белән чыгыш ясады. Ул хәбәр иткәнчә, Татарстан башкаласында, башка күпчелек шәһәрләрдәге кебек үк, муниципалитет дәрәҗәсендә туристлык салымын 2025 елның гыйнварыннан кертү турында карар кабул ителгән.

Бүгенге көндә шәһәрдә 16 мең урынга исәпләнгән 230 урнаштыру чарасы эшли, 2 меңнән артык җәмәгать туклануы ноктасы ачылган. Ел ахырына кадәр Казанда тагын өч эре кунакханә ачу планлаштырыла, аларны файдалануга тапшыру белән номерлар саны 517 гә артачак.

Казан мэриясеннән форумда Башкарма комитеты җитәкчесе урынбасары Илдар Шакиров та катнаша. Екатеринбургка Россиянең 250 муниципалитеты вәкилләре, шул исәптән 140 шәһәр башлыгы килгән.

Форум кысаларында территориаль планлаштырудан һәм халыкның тормыш сыйфатын яхшыртудан алып шәһәр транспортын һәм интернет-сәүдә перспективаларын үстерүгә кадәр темалар һәм проектлар карала. Алар барысы да муниципалитетларның һәм төбәкләрнең тотрыклы үсешенә юнәлдерелгән. Форум Россия Икътисадый үсеш министрлыгы патронажы астында уздырыла.

Шулай ук укыгыз

Барлык яңалыклар