2023 елга Казан бюджеты 38 млрд сум тәшкил итте

Узган ел Татарстан башкаласында 272 млрд сум салым җыелган иде.

Фото: Марат Мөгыйнов

(Казан шәһәре KZN.RU, 20 нче гыйнвар). Казанда Башкарма комитет бүлекчәләре җитәкчеләренең 2022 ел нәтиҗәләре һәм шәһәр Мэры Илсур Метшин алдында 2023 елга планнар буенча хисаплары старт алды. Беренче булып башкарылган эшләр турында Финанс идарәсе башлыгы Ирек Мөхәммәтшин җиткерде. Ул искәрткәнчә, узган ел Казан бюджеты башта 32,5 млрд сум күләмендә расланган булган. Ел нәтиҗәләре буенча ул 7 млрд сумга арткан һәм 39,8 млрд сум тәшкил иткән.

Узган елның эре салым түләүчеләре арасында «Аверс» банкы, «Казаноргсинтез» ГАҖ, «Волга-Автодор» ҖЧҖ, Горбунов исемендәге Казан авиация заводы, «Казан вертолет заводы» АҖ, «Күперләр һәм юллар» ҖЧҖ, Казан (Идел буе) федераль университеты, «КМПО» АҖ, «Водоканал» МУП, «Связьинвестнефтехим» АҖ һәм башкалар бар. Иң зур күләмдәге егерме салым түләүче Казан бюджетына 3,3 млрд сумнан артык акча күчергән – узган ел белән чагыштырганда 54% ка күбрәк.

Узган елда Казан территориясеннән барлыгы 272,2 млрд сум салым җыелган. Шулардан Россия Федерациясе бюджетына – 120,5 млрд сум (44,3%), Татарстан бюджетына – 133,7 млрд сум (49,1%) һәм Казан бюджетына 18 млрд сум (6,6%) күчерелгән.

2023 елга Казан бюджетының керемнәре һәм чыгымнары 37,8 млрд сум күләмендә расланган. Шуларның төп өлеше – 31 млрд сумга якыны – социаль-мәдәни өлкә чыгымнарына туры килә. Тагын 3,4 млрд сум – гомумдәүләт ихтыяҗларына һәм илкүләм иминлеккә, 3,1 млрд сум илкүләм икътисадка, ТКХ һәм табигатьне саклау чараларына юнәлдереләчәк.

Шулай ук укыгыз

Барлык яңалыклар